jabin-e-dil pe nadamat ka dagh rahta hai

jabīn-e-dil pe nadāmat kā daaġh rahtā hai

falak pe us kā hamesha dimāġh rahtā hai

gul-o-samar se ladā hai har ik shajar lekin

gayā hai kaun ki maġhmūm baaġh rahtā hai

taras rahā hai ujāle ko ḳhuun se jis ke

hasīn qasr meñ raushan charāġh rahtā hai

anā ke ḳhol se bāhar kabhī nahīñ aatā

vo jis kā ilm se ḳhālī ayāġh rahtā hai

jo kasb-e-rizq meñ ne.amat kā pā gayā mafhūm

usī amiir kā dil bhī farāġh rahtā hai

fareb-o-makr kī tashrīh mat batā mujh ko

mire shajar ke nasheman meñ zaaġh rahtā hai

hai inkishāf-e-haqīqat hī fitrat-e-'sāhil'

ajiib shaḳhs hai mahv-e-surāġh rahtā hai

jabin-e-dil pe nadamat ka dagh rahta hai

falak pe us ka hamesha dimagh rahta hai

gul-o-samar se lada hai har ek shajar lekin

gaya hai kaun ki maghmum bagh rahta hai

taras raha hai ujale ko KHun se jis ke

hasin qasr mein raushan charagh rahta hai

ana ke KHol se bahar kabhi nahin aata

wo jis ka ilm se KHali ayagh rahta hai

jo kasb-e-rizq mein neamat ka pa gaya mafhum

usi amir ka dil bhi faragh rahta hai

fareb-o-makr ki tashrih mat bata mujh ko

mere shajar ke nasheman mein zagh rahta hai

hai inkishaf-e-haqiqat hi fitrat-e-'sahil'

ajib shaKHs hai mahw-e-suragh rahta hai