jabin-e-shauq itni to sharik-e-kar ho jae

jabīn-e-shauq itnī to sharīk-e-kār ho jaa.e

jahāñ sajda karūñ maiñ āstān-e-yār ho jaa.e

sabā barham agar zulf-e-darāz-e-yār ho jaa.e

qayāmat karvaTeñ letī huī bedār ho jaa.e

banā do jis ko tum majbūr vo majbūr ban jaa.e

jise muḳhtār tum kah do vahī muḳhtār ho jaa.e

tujhe ma.alūm kyā ai ḳhvāb-e-hastī dekhne vaale

vahī hastī hai hastī jo nisār-e-yār ho jaa.e

jo ho jaa.e yaqīñ ā.eñge vo rasm-e-ayādat ko

na ho bīmār bhī koī to vo bīmār ho jaa.e

guzar jaa.e hudūd-e-ma.arifat se tālib-e-jalva

jo be-parda kisī saa.at jamāl-e-yār ho jaa.e

hukūmat hai junūñ par hast manshā tere vahshī kī

abhī dīvāna ban jaa.e abhī hoshyār ho jaa.e

faqat itnī itā.at chāhtī hai rahmat-e-yārī

ki insāñ ko gunah kā apne bas iqrār ho jaa.e

isī ko kāmyāb-e-dīd kahte haiñ nazar vaale

vo āshiq jo halāk-e-hasrat-e-dīdār ho jaa.e

na hogī ḳhatm phir bhī kashmakash shaiḳh-o-barahman kī

agar ham-rishta-e-tasbīh bhī zunnār ho jaa.e

samajh lenā vahīñ umr-e-ravāñ kī āḳhirī manzil

jahāñ par ḳhatm 'afqar' justujū-e-yār ho jaa.e

jabin-e-shauq itni to sharik-e-kar ho jae

jahan sajda karun main aastan-e-yar ho jae

saba barham agar zulf-e-daraaz-e-yar ho jae

qayamat karwaTen leti hui bedar ho jae

bana do jis ko tum majbur wo majbur ban jae

jise muKHtar tum kah do wahi muKHtar ho jae

tujhe malum kya ai KHwab-e-hasti dekhne wale

wahi hasti hai hasti jo nisar-e-yar ho jae

jo ho jae yaqin aaenge wo rasm-e-ayaadat ko

na ho bimar bhi koi to wo bimar ho jae

guzar jae hudud-e-marifat se talib-e-jalwa

jo be-parda kisi saat jamal-e-yar ho jae

hukumat hai junun par hast mansha tere wahshi ki

abhi diwana ban jae abhi hoshyar ho jae

faqat itni itaat chahti hai rahmat-e-yari

ki insan ko gunah ka apne bas iqrar ho jae

isi ko kaamyab-e-did kahte hain nazar wale

wo aashiq jo halak-e-hasrat-e-didar ho jae

na hogi KHatm phir bhi kashmakash shaiKH-o-barahman ki

agar ham-rishta-e-tasbih bhi zunnar ho jae

samajh lena wahin umr-e-rawan ki aaKHiri manzil

jahan par KHatm 'afqar' justuju-e-yar ho jae