jabin pe gard-e-kudurat mera usul nahin

jabīñ pe gard-e-kudūrat mirā usuul nahīñ

jafā-e-ahl-e-zamāna pe dil malūl nahīñ

mirī ḳhudī to khaTaktī thī terī āñkhoñ meñ

tire huzūr mirā ijz bhī qubūl nahīñ

ye bikhre taare ye be-nazm phuul shāhid haiñ

numūd-e-husn meñ pābandī-e-usūl nahīñ

zarūr kuchh to hai apnī hayāt kā maqsad

sunā hai chiiz koī dahr meñ fuzūl nahīñ

mire vaqār pe tere karam pe harf aatā

maqām-e-shukr hai merī duā qubūl nahīñ

mire ġhubār se dāman-kashāñ ho kyuuñ yaaro

chaman kī bū-e-pareshāñ huuñ ban kī dhuul nahīñ

jabin pe gard-e-kudurat mera usul nahin

jafa-e-ahl-e-zamana pe dil malul nahin

meri KHudi to khaTakti thi teri aankhon mein

tere huzur mera ijz bhi qubul nahin

ye bikhre tare ye be-nazm phul shahid hain

numud-e-husn mein pabandi-e-usul nahin

zarur kuchh to hai apni hayat ka maqsad

suna hai chiz koi dahr mein fuzul nahin

mere waqar pe tere karam pe harf aata

maqam-e-shukr hai meri dua qubul nahin

mere ghubar se daman-kashan ho kyun yaro

chaman ki bu-e-pareshan hun ban ki dhul nahin