jabki wo jaan-e-jahan bad-mast-e-KHwab aaya nazar

jabki vo jān-e-jahāñ bad-mast-e-ḳhvāb aaya nazar

zāhid-e-sad-sāla masjid meñ ḳharāb aaya nazar

jalva-e-mahbūb-e-haq kyā be-hijāb aaya nazar

māhtāb aaya nazar yā āftāb aaya nazar

hosh meñ rahtā nahīñ saaqī kī majlis meñ koī

ḳhushk zāhid bhī vahāñ mast-e-sharāb aaya nazar

chāk-dāman ḳhāk-bar-sar ḳhasta-dil tafta-jigar

terā shaidā.ī zamāne meñ ḳharāb aaya nazar

āshiqoñ ko tere hogī tāb-e-nazzāra kahāñ

hosh uḌ jā.eñge jab tū be-naqāb aaya nazar

āshiqoñ ko tere hogī tāb-e-nazzāra kahāñ

hosh uḌ jā.eñge jab tū be-naqāb aaya nazar

tere ruḳh ko dekh kar khoyā namāz-e-fajr ko

sajda jaa.ez hī nahīñ jab āftāb aaya nazar

chal rahā thā majlis-e-rindāñ meñ jab daur-e-sharāb

haa.e vaañ bhī mohtasib ḳhāna-ḳharāb aaya nazar

tāq-e-abrū aap kā hai sajda-gāh-e-āshiqāñ

kyoñ na ho dekhā to ka.abe kā javāb aaya nazar

siina biryāñ dil tapāñ hai ishq-e-jānāñ meñ mirā

chiir kar siina jigar dekhā kabāb aaya nazar

jab ḳhayāl aaya gunāhoñ kā to tere ḳhauf se

kaañp uThtā dil mirā roz-e-hisāb aaya nazar

josh rahmat ko huā aur dhul ga.e isyāñ tamām

jab 'qamar' aage tire chashm-e-pur-āb aaya nazar

jabki wo jaan-e-jahan bad-mast-e-KHwab aaya nazar

zahid-e-sad-sala masjid mein KHarab aaya nazar

jalwa-e-mahbub-e-haq kya be-hijab aaya nazar

mahtab aaya nazar ya aaftab aaya nazar

hosh mein rahta nahin saqi ki majlis mein koi

KHushk zahid bhi wahan mast-e-sharab aaya nazar

chaak-daman KHak-bar-sar KHasta-dil tafta-jigar

tera shaidai zamane mein KHarab aaya nazar

aashiqon ko tere hogi tab-e-nazzara kahan

hosh uD jaenge jab tu be-naqab aaya nazar

aashiqon ko tere hogi tab-e-nazzara kahan

hosh uD jaenge jab tu be-naqab aaya nazar

tere ruKH ko dekh kar khoya namaz-e-fajr ko

sajda jaez hi nahin jab aaftab aaya nazar

chal raha tha majlis-e-rindan mein jab daur-e-sharab

hae wan bhi mohtasib KHana-KHarab aaya nazar

taq-e-abru aap ka hai sajda-gah-e-ashiqan

kyon na ho dekha to kabe ka jawab aaya nazar

sina biryan dil tapan hai ishq-e-jaanan mein mera

chir kar sina jigar dekha kabab aaya nazar

jab KHayal aaya gunahon ka to tere KHauf se

kanp uThta dil mera roz-e-hisab aaya nazar

josh rahmat ko hua aur dhul gae isyan tamam

jab 'qamar' aage tere chashm-e-pur-ab aaya nazar