jaDaw chuDiyon ke hathon mein phaban kya KHub

jaḌāv chūḌiyoñ ke hāthoñ meñ phaban kyā ḳhuub

bhare bhare tire baazū pe nau-ratan kyā ḳhuub

khajūrī choTī ke qurbān vaah kyā kahnā

nisār pariyoñ ke mū-ba-mū shikan kyā ḳhuub

na.ī javānī kā josh aur ubhār siine kā

do-shāla Dhalkā huā sar se bāñkpan kyā ḳhuub

ajab bahār hai beloñ kī aur būToñ kī

parī dupaTTā tirā ġhairat-e-chaman kyā ḳhuub

izār-band ke lachchhe kā vaah re aalam

gudāz rānoñ pe pājāme kī shikan kyā ḳhuub

jo pahnā achchhā burā tū ne utrā ban ban kar

har ek chiiz meñ jaanī sajīlā-pan kyā ḳhuub

gulāb se tire gaal aur āñkheñ nargis se

ba-rañg-e-ġhuncha-lāla lab-o-dahan kyā ḳhuub

nazar phisalte hī vallāh merī āñkhoñ meñ ḳhaak

ki saaf saaf hai ā.īne sā badan kyā ḳhuub

ḳhudā ne nuur ke sāñche meñ tujh ko Dhālā hai

jo dekhtā hai vo kahtā hai ye suḳhan kyā ḳhuub

bayān husn kare terā 'bahr' kis muñh se

tirā banāv tire chhab tirī phaban kyā ḳhuub

jaDaw chuDiyon ke hathon mein phaban kya KHub

bhare bhare tere bazu pe nau-ratan kya KHub

khajuri choTi ke qurban wah kya kahna

nisar pariyon ke mu-ba-mu shikan kya KHub

nai jawani ka josh aur ubhaar sine ka

do-shaala Dhalka hua sar se bankpan kya KHub

ajab bahaar hai belon ki aur buTon ki

pari dupaTTa tera ghairat-e-chaman kya KHub

izar-band ke lachchhe ka wah re aalam

gudaz ranon pe pajame ki shikan kya KHub

jo pahna achchha bura tu ne utra ban ban kar

har ek chiz mein jaani sajila-pan kya KHub

gulab se tere gal aur aankhen nargis se

ba-rang-e-ghuncha-lala lab-o-dahan kya KHub

nazar phisalte hi wallah meri aankhon mein KHak

ki saf saf hai aaine sa badan kya KHub

KHuda ne nur ke sanche mein tujh ko Dhaala hai

jo dekhta hai wo kahta hai ye suKHan kya KHub

bayan husn kare tera 'bahr' kis munh se

tera banaw tere chhab teri phaban kya KHub