جفائے چرخ کہ جور بتاں نہیں ہوتا

جفائے چرخ کہ جور بتاں نہیں ہوتا

وفا کے نام پہ کیا کیا یہاں نہیں ہوتا

وہ اپنی خوئے جفا تو نہیں بھلا بیٹھے

ہے بات کیا جو مرا امتحاں نہیں ہوتا

جو بے نیاز تقاضائے آستاں کر دے

وہ سجدہ دوش جبیں پر گراں نہیں ہوتا

خلوص جذبۂ تعمیر بھی ہے شرط اے دوست

کہ چار تنکوں کا نام آشیاں نہیں ہوتا

نگاہ یار کا انداز دلبری توبہ

میں لٹ گیا بھی مگر بد گماں نہیں ہوتا

یہ کیا بہار ہے کیسی یہ فصل گل مسلمؔ

کہ جس کو دیکھ کے دل شادماں نہیں ہوتا