jafa par jaan dete hain sitam par tere marte hain

jafā par jaan dete haiñ sitam par tere marte haiñ

ye nākām-e-mohabbat sach to ye hai kaam karte haiñ

kaheñ kyā ham pe jo sadme guzarte haiñ guzarte haiñ

lagāyā jis ghaḌī dil us ghaḌī ko yaad karte haiñ

tamāsha jab se dekhā hai mire dil ke taḌapne kā

tamāsha hai ki vo apnī nazar se aap Darte haiñ

nahīñ aate na aa.eñ vo ga.e tāb-o-tavāñ jaa.eñ

tujhī par aaj ham ai be-qarārī sabr karte haiñ

galī kūchoñ meñ tum ne ishtihār-e-ishq phailā.e

ki uḌ-uḌ kar mire maktūb ke purze bikharte haiñ

adā be-sāḳhta un gesuoñ kī kuchh nirālī hai

banā.e se bigaḌte haiñ sañvāre se bikharte haiñ

na pūchho 'dāġh' ham se intizār-e-yār kī sūrat

ye āñkheñ jāntī haiñ ḳhuub jo naqshe guzarte haiñ

jafa par jaan dete hain sitam par tere marte hain

ye nakaam-e-mohabbat sach to ye hai kaam karte hain

kahen kya hum pe jo sadme guzarte hain guzarte hain

lagaya jis ghaDi dil us ghaDi ko yaad karte hain

tamasha jab se dekha hai mere dil ke taDapne ka

tamasha hai ki wo apni nazar se aap Darte hain

nahin aate na aaen wo gae tab-o-tawan jaen

tujhi par aaj hum ai be-qarari sabr karte hain

gali kuchon mein tum ne ishtihaar-e-ishq phailae

ki uD-uD kar mere maktub ke purze bikharte hain

ada be-saKHta un gesuon ki kuchh nirali hai

banae se bigaDte hain sanware se bikharte hain

na puchho 'dagh' hum se intizar-e-yar ki surat

ye aankhen jaanti hain KHub jo naqshe guzarte hain