jahan bachpan guzara tha wo ghar pahchante hain

jahāñ bachpan guzārā thā vo ghar pahchānte haiñ

abhī ham shahr kī har rahguzar pahchānte haiñ

parinde jis taraf jaa.eñ palaT aate haiñ shab ko

vo apnā āshiyāñ apnā shajar pahchānte haiñ

abhī galiyāñ nahīñ bhūleñ mire qadmoñ kī aahaT

mujhe is shahr ke dar-o-dīvār pahchānte haiñ

kabhī mere havāle se rahī pahchān jin kī

mujhe vo paas aa kar soch kar pahchānte haiñ

nahīñ pahchānte kuchh log duniyā meñ to kyā hai

mire fan ko sabhī ahl-e-nazar pahchānte haiñ

jo āñkheñ rauzanoñ se jhāñktī thiiñ ab nahīñ haiñ

gharoñ ke band darvāze magar pahchānte haiñ

'munavvar' ham ne yuuñ is shahr kī chīzoñ ko dekhā

musāfir jaise sāmān-e-safar pahchānte haiñ

jahan bachpan guzara tha wo ghar pahchante hain

abhi hum shahr ki har rahguzar pahchante hain

parinde jis taraf jaen palaT aate hain shab ko

wo apna aashiyan apna shajar pahchante hain

abhi galiyan nahin bhulen mere qadmon ki aahaT

mujhe is shahr ke dar-o-diwar pahchante hain

kabhi mere hawale se rahi pahchan jin ki

mujhe wo pas aa kar soch kar pahchante hain

nahin pahchante kuchh log duniya mein to kya hai

mere fan ko sabhi ahl-e-nazar pahchante hain

jo aankhen rauzanon se jhankti thin ab nahin hain

gharon ke band darwaze magar pahchante hain

'munawwar' hum ne yun is shahr ki chizon ko dekha

musafir jaise saman-e-safar pahchante hain