jahan-e-arzu aawaz hi aawaz hota hai

jahān-e-ārzū āvāz hī āvāz hotā hai

baḌī mushkil se ehsās-e-shikast-e-sāz hotā hai

hameñ kyā aap anjām-e-mohabbat se Darāte haiñ

hamāre ḳhuun se har daur kā āġhāz hotā hai

qafas hai daam hai bhaḌkī huī hai ātish-e-gul bhī

isī māhaul meñ andāza-e-parvāz hotā hai

pighal jaatī haiñ zanjīreñ sulag uThtī haiñ dīvāreñ

lab-e-ḳhāmosh meñ vo shola-e-āvāz hotā hai

mohabbat kī haqīqat khul ga.ī chāk-e-girebāñ se

junūñ bhī ek manzil meñ zamāna-sāz hotā hai

hamīñ par munhasir hai raunaq-e-bazm-e-jahāñ 'qābil'

koī naġhma ho apnā hī rahīn-e-saz hotā hai

jahan-e-arzu aawaz hi aawaz hota hai

baDi mushkil se ehsas-e-shikast-e-saz hota hai

hamein kya aap anjam-e-mohabbat se Daraate hain

hamare KHun se har daur ka aaghaz hota hai

qafas hai dam hai bhaDki hui hai aatish-e-gul bhi

isi mahaul mein andaza-e-parwaz hota hai

pighal jati hain zanjiren sulag uThti hain diwaren

lab-e-KHamosh mein wo shola-e-awaz hota hai

mohabbat ki haqiqat khul gai chaak-e-gireban se

junun bhi ek manzil mein zamana-saz hota hai

hamin par munhasir hai raunaq-e-bazm-e-jahan 'qabil'

koi naghma ho apna hi rahin-e-saz hota hai