جہان عشق اب سونا پڑا ہے

جہان عشق اب سونا پڑا ہے

تمہیں پا کر کے بھی کھونا پڑا ہے

اداسی ہو گئی مجھ پر مسلط

تمہیں بھی رات دن رونا پڑا ہے

پڑا رہتا تھا اک کونے میں ہر دم

مگر اب مجھ میں ہی کونا پڑا ہے

بھگانے کے لیے خوابوں سے تم کو

تصور میں تمہیں چھونا پڑا ہے

یہی کیا کم قیامت ہے مری جاں

تمہیں چومے بنا سونا پڑا ہے

میں دو سے ایک پھر زیرو ہوا ہوں

مگر یہ عشق کیوں دونا پڑا ہے

ترے دامن کے داغوں کو مجھے جاں

جگر کے خوں سے کیوں دھونا پڑا ہے

غموں کا بوجھ تھا یکساں سبھی پر

مگر کاشفؔ کو ہی ڈھونا پڑا ہے