jahan-e-KHair-o-shar se uTh ke kya jaane kahan jate

jahān-e-ḳhair-o-shar se uTh ke kyā jaane kahāñ jaate

koī jannat agar hotī to farzāne kahāñ jaate

kashish dasht-e-junūñ kī ain fitrat hī sahī lekin

dam-e-arz-e-tamanna tere dīvāne kahāñ jaate

ye bazm-e-mai nahīñ hai balki ik ā.īna-ḳhāna hai

use tum chhoḌ kar zulfoñ ko suljhāne kahāñ jaate

ḳhalish jab aarzū kī miT nahīñ saktī to aise meñ

sukūn-e-qalb kī ḳhātir ye dīvāne kahāñ jaate

nigāh-e-mast se be-ḳhud kiyā ham ko magar sochā

hamāre haath se chhuT kar ye paimāne kahāñ jaate

nahīñ ma.alūm kis ke sang-e-dar par hai paḌā 'manzar'

janāb-e-shaiḳh farmā.eñ ki samjhāne kahāñ jaate

jahan-e-KHair-o-shar se uTh ke kya jaane kahan jate

koi jannat agar hoti to farzane kahan jate

kashish dasht-e-junun ki ain fitrat hi sahi lekin

dam-e-arz-e-tamanna tere diwane kahan jate

ye bazm-e-mai nahin hai balki ek aaina-KHana hai

use tum chhoD kar zulfon ko suljhane kahan jate

KHalish jab aarzu ki miT nahin sakti to aise mein

sukun-e-qalb ki KHatir ye diwane kahan jate

nigah-e-mast se be-KHud kiya hum ko magar socha

hamare hath se chhuT kar ye paimane kahan jate

nahin malum kis ke sang-e-dar par hai paDa 'manzar'

janab-e-shaiKH farmaen ki samjhane kahan jate