جہان خیر و شر سے اٹھ کے کیا جانے کہاں جاتے

جہان خیر و شر سے اٹھ کے کیا جانے کہاں جاتے

کوئی جنت اگر ہوتی تو فرزانے کہاں جاتے

کشش دشت جنوں کی عین فطرت ہی سہی لیکن

دم عرض تمنا تیرے دیوانے کہاں جاتے

یہ بزم مے نہیں ہے بلکہ اک آئینہ خانہ ہے

اسے تم چھوڑ کر زلفوں کو سلجھانے کہاں جاتے

خلش جب آرزو کی مٹ نہیں سکتی تو ایسے میں

سکون قلب کی خاطر یہ دیوانے کہاں جاتے

نگاہ مست سے بے خود کیا ہم کو مگر سوچا

ہمارے ہاتھ سے چھٹ کر یہ پیمانے کہاں جاتے

نہیں معلوم کس کے سنگ در پر ہے پڑا منظرؔ

جناب شیخ فرمائیں کہ سمجھانے کہاں جاتے