jahan-e-wahshat ke kar-KHane mein kaun kar-e-junun karega

jahān-e-vahshat ke kār-ḳhāne meñ kaun kār-e-junūñ karegā

hamāre jaane ke baa'd bhī kyā koī fazā nīlgūñ karegā

ye apne ḳheme kā ek bīmār aadmī hai jo beḌiyoñ meñ

tumhārī āñkheñ baras paḌeñgī bayāñ jo hāl-e-darūñ karegā

bas ek chhoTe se niim qasbe kā rahne vaalā 'ajīb laḌkā

kise ḳhabar thī ki vaqt ke bādshāh kā sar nigūñ karegā

koī to hogā ki jis pe ik din ye rāz-e-kaun-o-makāñ khulegā

ham aise majnūñ pe sab se pahle vo āshkār-e-fusūñ karegā

guzarte mausam ke saath zaḳhm-e-jigar bhī nāsūr ho rahā hai

vo ek baar apne haath phere ye raushnī juuñ kā tuuñ karegā

maiñ dasht meñ nīm-shab ko āḳhir batāo rahvār roktā kyoñ

ye jāntā gar ki merā dushman bhī aaj hī merā ḳhuuñ karegā

vo ek būḌhā shajar bhī 'āsif' ḳhizāñ-rasīda hī ho rahā hai

ye vaqt kī tez dhuup āḳhir kahāñ talak pur-sukūñ karegā

jahan-e-wahshat ke kar-KHane mein kaun kar-e-junun karega

hamare jaane ke ba'd bhi kya koi faza nilgun karega

ye apne KHeme ka ek bimar aadmi hai jo beDiyon mein

tumhaari aankhen baras paDengi bayan jo haal-e-darun karega

bas ek chhoTe se nim qasbe ka rahne wala 'ajib laDka

kise KHabar thi ki waqt ke baadshah ka sar nigun karega

koi to hoga ki jis pe ek din ye raaz-e-kaun-o-makan khulega

hum aise majnun pe sab se pahle wo aashkar-e-fusun karega

guzarte mausam ke sath zaKHm-e-jigar bhi nasur ho raha hai

wo ek bar apne hath phere ye raushni jun ka tun karega

main dasht mein nim-shab ko aaKHir batao rahwar rokta kyon

ye jaanta gar ki mera dushman bhi aaj hi mera KHun karega

wo ek buDha shajar bhi 'asif' KHizan-rasida hi ho raha hai

ye waqt ki tez dhup aaKHir kahan talak pur-sukun karega