jahan hum tum milen firdaus wo virana ho jae

jahāñ ham tum mileñ firdaus vo vīrāna ho jaa.e

piyeñ mai jis jagah vo rashk-e-sad-mai-ḳhāna ho jaa.e

agar dil be-niyāz-e-ka.aba-o-but-ḳhāna ho jaa.e

tajallī-rez har jānib ruḳh-e-jānāna ho jaa.e

maiñ betāb-e-tamanna huuñ vo majbūr-e-tamāshā haiñ

kahīñ rāz-e-mohabbat bazm meñ rusvā na ho jaa.e

nigāh-e-tund phir ai kaash paḌ jaa.e mire dil par

sharāb-e-talḳh se labrez phir paimāna ho jaa.e

pahuñch jaa.e mirā dast-e-tamannā un ke dāman tak

agar terā karam ai jur.at-e-rindāna ho jaa.e

isī hasrat meñ shab-bhar rahtī hai bechain niiñd apnī

ki vo jān-e-tamannā raunaq-e-kāshāna ho jaa.e

hai merī dāstān-e-dil bhī koī dāstāñ lekin

suno gar shauq se afsāna-dar-afsāna ho jaa.e

girūñ mastī meñ sau sau baar ḳham se Thokareñ khā kar

namāz-e-āshiqī har laġhzish-e-mastāna ho jaa.e

tajallī kī ye bārish aur mirī hairat kā ye aalam

kahīñ jalva naqāb-e-jalva-e-zebā na ho jaa.e

fidā vo sham.a par ho maiñ nisār-e-rū-e-tābāñ huuñ

mirī himmat javāb-e-himmat-e-parvāna ho jaa.e

na but-ḳhāne ke laa.eq hai na ka.abe hī ke qābil hai

na dil jab tak ḳharāb-e-nargis-e-mastānā ho jaa.e

mirī hastī hijāb-e-husn hai rāh-e-mohabbat meñ

ye parda gar uThe nazzāra-e-jānāna ho jaa.e

jahan hum tum milen firdaus wo virana ho jae

piyen mai jis jagah wo rashk-e-sad-mai-KHana ho jae

agar dil be-niyaz-e-kaba-o-but-KHana ho jae

tajalli-rez har jaanib ruKH-e-jaanana ho jae

main betab-e-tamanna hun wo majbur-e-tamasha hain

kahin raaz-e-mohabbat bazm mein ruswa na ho jae

nigah-e-tund phir ai kash paD jae mere dil par

sharab-e-talKH se labrez phir paimana ho jae

pahunch jae mera dast-e-tamanna un ke daman tak

agar tera karam ai jurat-e-rindana ho jae

isi hasrat mein shab-bhar rahti hai bechain nind apni

ki wo jaan-e-tamanna raunaq-e-kashana ho jae

hai meri dastan-e-dil bhi koi dastan lekin

suno gar shauq se afsana-dar-afsana ho jae

girun masti mein sau sau bar KHam se Thokaren kha kar

namaz-e-ashiqi har laghzish-e-mastana ho jae

tajalli ki ye barish aur meri hairat ka ye aalam

kahin jalwa naqab-e-jalwa-e-zeba na ho jae

fida wo shama par ho main nisar-e-ru-e-taban hun

meri himmat jawab-e-himmat-e-parwana ho jae

na but-KHane ke laeq hai na kabe hi ke qabil hai

na dil jab tak KHarab-e-nargis-e-mastana ho jae

meri hasti hijab-e-husn hai rah-e-mohabbat mein

ye parda gar uThe nazzara-e-jaanana ho jae