jahan jahan bhi hawas ka ye jaanwar jae

jahāñ jahāñ bhī havas kā ye jānvar jaa.e

diloñ se mehr-o-mohabbat kī fasl char jaa.e

khule haiñ ūñchī havelī ke pāltū kutte

faqīr-e-rāh zarā dekh-bhāl kar jaa.e

vahīñ se huuñ maiñ jahāñ se dikhā.ī detā huuñ

vahīñ tilak huuñ jahāñ tak mirī nazar jaa.e

hai koī der se us paar muntazir merā

rukā huā huuñ ki naddī zarā utar jaa.e

vo bād-e-tund hai har peḌ kī ye koshish hai

havā ke saath koī dūsrā shajar jaa.e

hudūd-e-zāt se aage ḳhudāoñ kī had hai

meñ sochtā huuñ agar zehn kaam kar jaa.e

bharī paḌī hai ufūnat se inch inch zamīñ

is ek phuul kī ḳhushbū kidhar kidhar jaa.e

abhī talak tire raste meñ pul-sirāt pe hai

guzarne vaalā zarūrī nahīñ guzar jaa.e

'nasīm' gaañv kī masjid meñ raat kāTegā

ik ajnabī sā musāfir hai kis ke ghar jaa.e

jahan jahan bhi hawas ka ye jaanwar jae

dilon se mehr-o-mohabbat ki fasl char jae

khule hain unchi haweli ke paltu kutte

faqir-e-rah zara dekh-bhaal kar jae

wahin se hun main jahan se dikhai deta hun

wahin tilak hun jahan tak meri nazar jae

hai koi der se us par muntazir mera

ruka hua hun ki naddi zara utar jae

wo baad-e-tund hai har peD ki ye koshish hai

hawa ke sath koi dusra shajar jae

hudud-e-zat se aage KHudaon ki had hai

mein sochta hun agar zehn kaam kar jae

bhari paDi hai ufunat se inch inch zamin

is ek phul ki KHushbu kidhar kidhar jae

abhi talak tere raste mein pul-siraat pe hai

guzarne wala zaruri nahin guzar jae

'nasim' ganw ki masjid mein raat kaTega

ek ajnabi sa musafir hai kis ke ghar jae