jahan-jahan se bhi jhilmil teri guzarti hai

jahāñ-jahāñ se bhī jhilmil tirī guzartī hai

diloñ ko aa.ina kartī huī guzartī hai

nujūm donoñ taraf saf-ba-saf khaḌe hue haiñ

fazā-e-shab se tirī pālkī guzartī hai

tire baġhair hameñ saañs tak nahīñ aatī

kabhī to is se bhī mushkil ghaḌī guzartī hai

nashāt-e-shām-e-tilismāt ko davām nahīñ

lahū se mauj-e-shafaq aarzī guzartī hai

ufuq pe rahtī nahīñ der tak chamak merī

shahābī raushnī yak-bārgī guzartī hai

ye zindagī bhī ajab hai ki dostoñ ke baġhair

kabhī guzartī nahīñ hai kabhī guzartī hai

bas ek raat kā TukḌā hai kahkashāñ-āsār

baqāyā shab to añdheroñ meñ hī guzartī hai

hazār hāl-o-maqāmāt se guzartā hai dil

nazar se masnavī-e-ma.anavī guzartī hai

hayāt apne tasalsul meñ hai abad-āhang

ki ik guzar ga.ī hai dūsrī guzartī hai

kasīf dil se ḳhushī mun'atif nahīñ hotī

siyāh shīshe se kab chāñdnī guzartī hai

bhuchak ke dekhte haiñ bail-gāḌiyoñ vaale

saroñ se koī uḌan tashtarī guzartī hai

agar guzartā hai din mujh meñ chhe mahīnoñ kā

to itne arse kī phir raat bhī guzartī hai

ḳhud apnī aag meñ jaltī hai auñdhe muñh gir kar

ye kis azaab se duniyā tirī guzartī hai

sharāb o shahd kī nahreñ yahāñ nahīñ bahtīñ

zamīñ ke baaġh se ḳhuuñ kī nadī guzartī hai

samay ke parda-e-sīmīñ pe kyā dikhā.eñ tumheñ

jo lā-shu.ūr se be-manzarī guzartī hai

guzār lete haiñ āḳhir guzārne vaale

hayāt jaisī bhī achchhī burī guzartī hai

jahāñ sujūd meñ gir jaanā chāhiye us ko

vahāñ se ḳhalq-e-ḳhudā sarsarī guzartī hai

daboch letā hai dil kā siyāh rauzan use

qarīb se jo koī raushnī guzartī hai

makān koh-e-nidā ke qarīb hai 'shāhid'

samā.atoñ se navā nit na.ī guzartī hai

jahan-jahan se bhi jhilmil teri guzarti hai

dilon ko aaina karti hui guzarti hai

nujum donon taraf saf-ba-saf khaDe hue hain

faza-e-shab se teri palki guzarti hai

tere baghair hamein sans tak nahin aati

kabhi to is se bhi mushkil ghaDi guzarti hai

nashat-e-sham-e-tilismat ko dawam nahin

lahu se mauj-e-shafaq aarzi guzarti hai

ufuq pe rahti nahin der tak chamak meri

shahabi raushni yak-bargi guzarti hai

ye zindagi bhi ajab hai ki doston ke baghair

kabhi guzarti nahin hai kabhi guzarti hai

bas ek raat ka TukDa hai kahkashan-asar

baqaya shab to andheron mein hi guzarti hai

hazar haal-o-maqamat se guzarta hai dil

nazar se masnawi-e-manawi guzarti hai

hayat apne tasalsul mein hai abad-ahang

ki ek guzar gai hai dusri guzarti hai

kasif dil se KHushi mun'atif nahin hoti

siyah shishe se kab chandni guzarti hai

bhuchak ke dekhte hain bail-gaDiyon wale

saron se koi uDan tashtari guzarti hai

agar guzarta hai din mujh mein chhe mahinon ka

to itne arse ki phir raat bhi guzarti hai

KHud apni aag mein jalti hai aundhe munh gir kar

ye kis azab se duniya teri guzarti hai

sharab o shahd ki nahren yahan nahin bahtin

zamin ke bagh se KHun ki nadi guzarti hai

samay ke parda-e-simin pe kya dikhaen tumhein

jo la-shuur se be-manzari guzarti hai

guzar lete hain aaKHir guzarne wale

hayat jaisi bhi achchhi buri guzarti hai

jahan sujud mein gir jaana chahiye us ko

wahan se KHalq-e-KHuda sarsari guzarti hai

daboch leta hai dil ka siyah rauzan use

qarib se jo koi raushni guzarti hai

makan koh-e-nida ke qarib hai 'shahid'

samaaton se nawa nit nai guzarti hai