jahan ko chhoD diya tha jahan ne yaad kiya

jahāñ ko chhoḌ diyā thā jahāñ ne yaad kiyā

bichhaḌ ga.e to bahut kārvāñ ne yaad kiyā

milā nahīñ use shāyad koī sitam ke liye

zah-e-nasīb mujhe āsmāñ ne yaad kiyā

vo ek dil jo kaḌī dhuup meñ jhulastā thā

use bhī sāya-e-zulf-e-butāñ ne yaad kiyā

panāh mil na sakī un ko tere dāman meñ

vo ashk jin ko mah-o-kahkashāñ ne yaad kiyā

ḳhayāl ham ko bhī kuchh āshiyāñ kā thā lekin

qafas meñ ham ko bahut āshiyāñ ne yaad kiyā

hamāre baa'd bahā.e kisī ne kab aañsū

ham ahl-e-dard ko abr-e-ravāñ ne yaad kiyā

ġham-e-zamāna se fursat nahīñ magar phir bhī

'majīd' chal tujhe pīr-e-muġhāñ ne yaad kiyā

jahan ko chhoD diya tha jahan ne yaad kiya

bichhaD gae to bahut karwan ne yaad kiya

mila nahin use shayad koi sitam ke liye

zah-e-nasib mujhe aasman ne yaad kiya

wo ek dil jo kaDi dhup mein jhulasta tha

use bhi saya-e-zulf-e-butan ne yaad kiya

panah mil na saki un ko tere daman mein

wo ashk jin ko mah-o-kahkashan ne yaad kiya

KHayal hum ko bhi kuchh aashiyan ka tha lekin

qafas mein hum ko bahut aashiyan ne yaad kiya

hamare ba'd bahae kisi ne kab aansu

hum ahl-e-dard ko abr-e-rawan ne yaad kiya

gham-e-zamana se fursat nahin magar phir bhi

'majid' chal tujhe pir-e-mughan ne yaad kiya