jahan mabud Thahraya gaya hun

jahāñ ma.abūd Thahrāyā gayā huuñ

vahīñ suulī pe laTkāyā gayā huuñ

sunā har baar merā kalma-e-sidq

magar har baar jhuThlāyā gayā huuñ

kabhī maazī kā jaise tazkira ho

zabāñ par is tarah laayā gayā huuñ

abhī tadfīn baaqī hai abhī to

lahū se apne nahlāyā gayā huuñ

davāmī azmatoñ ke maqbare meñ

hazāroñ baar dafnāyā gayā huuñ

taras kaisā ki is dār-ul-balā meñ

azal ke din se tarsāyā gayā huuñ

na jaane kaun se sāñche meñ Dhāleñ

abhī to sirf pighlāyā gayā huuñ

maiñ is hairat-sarā-e-āb-o-gil meñ

ba-hukm-e-ḳhās bhejvāyā gayā huuñ

jahan mabud Thahraya gaya hun

wahin suli pe laTkaya gaya hun

suna har bar mera kalma-e-sidq

magar har bar jhuThlaya gaya hun

kabhi mazi ka jaise tazkira ho

zaban par is tarah laya gaya hun

abhi tadfin baqi hai abhi to

lahu se apne nahlaya gaya hun

dawami azmaton ke maqbare mein

hazaron bar dafnaya gaya hun

taras kaisa ki is dar-ul-bala mein

azal ke din se tarsaya gaya hun

na jaane kaun se sanche mein Dhaalen

abhi to sirf pighlaya gaya hun

main is hairat-sara-e-ab-o-gil mein

ba-hukm-e-KHas bhejwaya gaya hun