جہاں میں اب کسی کا بھی کسی کو ڈر نہیں رہا

جہاں میں اب کسی کا بھی کسی کو ڈر نہیں رہا

خدا خدا نہیں رہا بشر بشر نہیں رہا

کسی کے درد کا یہاں علاج ہی نہیں کوئی

دوا ہی کیا دعا میں بھی کوئی اثر نہیں رہا

مشین بن گیا ہے آدمی غم معاش میں

دھڑکتا دل پگھلتا اس کا اب جگر نہیں رہا

شجر شجر جھلس گیا الم کی تیز دھوپ میں

جو ہم کو چھاؤں دے کہیں کوئی شجر نہیں رہا

بکے ہوئے ہیں سجدے اب ہر آستاں ہے اک دکاں

خلوص جس جگہ جھکے وہ سنگ در نہیں رہا

گناہ کیا ثواب کیا جب آ گیا ترے حضور

سزا جزا کا سحرؔ کو کوئی خطر نہیں رہا