jahan mein hausla-e-izz-o-nam paida kar

jahāñ meñ hausla-e-'izz-o-nām paidā kar

pas-e-fanā bhī baqā-e-davām paidā kar

jigar meñ lazzat-e-soz-e-davām paidā kar

dayār-e-ishq meñ apnā maqām paidā kar

baras paḌeñgī nigāheñ chahār jānib se

faroġh-e-jalva-e-māh-e-tamām paidā kar

naved-e-shauq tirī rā.egāñ na jā.egī

magar salīqa-e-arz-e-payām paidā kar

sukūn-e-sāhil-e-dariyā na DhūñD dariyā meñ

misāl-e-mauj-e-jahanda ḳhirām paidā kar

har ek fard ho millat kā nāzish-e-daurāñ

nizām-e-dahr meñ aisā nizām paidā kar

na ho farefta-e-sāġhar-o-ḳhum-e-maġhrib

vatan kī ḳhaak se mīnā-o-jām paidā kar

agar hai hausla-e-dīd-e-shāhid-e-maqsūd

to pahle zauq-e-tamāshā-e-bām paidā kar

ḳhudī kī quvvat-e-pinhāñ se kaam le hama-dam

diloñ meñ ġhair ke bhī ehtirām paidā kar

farefta dil-e-sayyād bhī ho o bulbul

na.ī tarah kī taḌap zer-e-dām paidā kar

nazar na ā.eñge yuuñ jalva-hā-e-rangā-rang

jadīd zauq-e-nazar sub.h-o-shām paidā kar

pasand hai tujhe kyoñ pastī-e-zamīñ āḳhir

falak se bhī kahīñ a.alā maqām paidā kar

buland-hauslagī hai shi.ār-e-ahl-e-ḳhirad

hilāl toḌ de māh-e-tamām paidā kar

hai maut qatra-e-ahqar kī dūrī-e-dariyā

ba-rang-e-mauj visāl-e-davām paidā kar

'valī' badal de urūs-e-suḳhan kā rang-e-kuhan

misāl-e-hazrat-e-'iqbāl' naam paidā kar

jahan mein hausla-e-'izz-o-nam paida kar

pas-e-fana bhi baqa-e-dawam paida kar

jigar mein lazzat-e-soz-e-dawam paida kar

dayar-e-ishq mein apna maqam paida kar

baras paDengi nigahen chahaar jaanib se

farogh-e-jalwa-e-mah-e-tamam paida kar

nawed-e-shauq teri raegan na jaegi

magar saliqa-e-arz-e-payam paida kar

sukun-e-sahil-e-dariya na DhunD dariya mein

misal-e-mauj-e-jahanda KHiram paida kar

har ek fard ho millat ka nazish-e-dauran

nizam-e-dahr mein aisa nizam paida kar

na ho farefta-e-saghar-o-KHum-e-maghrib

watan ki KHak se mina-o-jam paida kar

agar hai hausla-e-did-e-shahid-e-maqsud

to pahle zauq-e-tamasha-e-baam paida kar

KHudi ki quwwat-e-pinhan se kaam le hama-dam

dilon mein ghair ke bhi ehtiram paida kar

farefta dil-e-sayyaad bhi ho o bulbul

nai tarah ki taDap zer-e-dam paida kar

nazar na aaenge yun jalwa-ha-e-ranga-rang

jadid zauq-e-nazar subh-o-sham paida kar

pasand hai tujhe kyon pasti-e-zamin aaKHir

falak se bhi kahin aala maqam paida kar

buland-hauslagi hai shiar-e-ahl-e-KHirad

hilal toD de mah-e-tamam paida kar

hai maut qatra-e-ahqar ki duri-e-dariya

ba-rang-e-mauj visal-e-dawam paida kar

'wali' badal de urus-e-suKHan ka rang-e-kuhan

misal-e-hazrat-e-'iqbaal' nam paida kar