jahan mein jins-e-wafa kam hai kal-adam to nahin

jahāñ meñ jins-e-vafā kam hai kal-adam to nahīñ

hamāre hausla-e-dil ko ye bhī kam to nahīñ

ham ek saañs meñ pī jaa.eñ jām-e-jam to nahīñ

sarishk-e-ġham haiñ piyeñge par ek dam to nahīñ

tumhāre qahr kī ḳhātir akele ham to nahīñ

nigāh-e-mehr bhī Daalo tumheñ qasam to nahīñ

ḳhudā kā ghar hai mirā dil yahāñ sanam to nahīñ

ye mai-kada to nahīñ hai ye kuchh haram to nahīñ

mire ġhamoñ kā tujhe kyā lagegā andāza

ki tujh ko apne hī ġham haiñ parā.e ġham to nahīñ

mire ḳhayāl meñ pechīdgī sahī lekin

tumhārī zulfoñ kī mānind pech-o-ḳham to nahīñ

junūñ nahīñ hameñ pīchhe lageñ jo duniyā ke

ḳhudā ke bande haiñ ham banda-e-shikam to nahīñ

hazār kaif bahisht-e-barīñ meñ haiñ lekin

dil apnā jis kā hai ḳhūgar vo kaif-e-ġham to nahīñ

lagegī der sambhalne meñ laġhzish0-e-dil se

sambhal khaḌe hoñ nazar laġhzish-e-qadam to nahīñ

jahan mein jins-e-wafa kam hai kal-adam to nahin

hamare hausla-e-dil ko ye bhi kam to nahin

hum ek sans mein pi jaen jam-e-jam to nahin

sarishk-e-gham hain piyenge par ek dam to nahin

tumhaare qahr ki KHatir akele hum to nahin

nigah-e-mehr bhi Dalo tumhein qasam to nahin

KHuda ka ghar hai mera dil yahan sanam to nahin

ye mai-kada to nahin hai ye kuchh haram to nahin

mere ghamon ka tujhe kya lagega andaza

ki tujh ko apne hi gham hain parae gham to nahin

mere KHayal mein pechidgi sahi lekin

tumhaari zulfon ki manind pech-o-KHam to nahin

junun nahin hamein pichhe lagen jo duniya ke

KHuda ke bande hain hum banda-e-shikam to nahin

hazar kaif bahisht-e-barin mein hain lekin

dil apna jis ka hai KHugar wo kaif-e-gham to nahin

lagegi der sambhalne mein laghzish0-e-dil se

sambhal khaDe hon nazar laghzish-e-qadam to nahin