jahan na dost na gulchin na baghban mera

jahāñ na dost na gulchīñ na bāġhbāñ merā

phir is chaman meñ rahe kyūñkar āshiyāñ merā

sharīk-e-hāl bure vaqt meñ ye hotā hai

sivā.e ġham ke nahīñ koī mehrbāñ merā

ilāhī ḳhāna-e-sayyād par gire bijlī

ki fasl-e-gul meñ jalāyā hai āshiyāñ merā

kuchh āj-kal ke sitam kā gila nahīñ us se

azal ke roz se dushman hai āsmāñ merā

tumhāre ġham ke sivā merī jaan duniyā meñ

na koī dost hai merā na mehrbāñ merā

na ḳhauf charḳh kā phir ho na ġhair kā khaTkā

jo tum ho mere to jaano ki hai jahāñ merā

vo faash kartā hai parda to ye chhupātī hai

zamīn dost hai dushman hai āsmāñ merā

zabāñ vo 'dāġh' ke sadqe meñ paa.ī hai 'mahmūd'

ki shā.erī meñ nahīñ koī ham-zabāñ merā

jahan na dost na gulchin na baghban mera

phir is chaman mein rahe kyunkar aashiyan mera

sharik-e-haal bure waqt mein ye hota hai

siwae gham ke nahin koi mehrban mera

ilahi KHana-e-sayyaad par gire bijli

ki fasl-e-gul mein jalaya hai aashiyan mera

kuchh aaj-kal ke sitam ka gila nahin us se

azal ke roz se dushman hai aasman mera

tumhaare gham ke siwa meri jaan duniya mein

na koi dost hai mera na mehrban mera

na KHauf charKH ka phir ho na ghair ka khaTka

jo tum ho mere to jaano ki hai jahan mera

wo fash karta hai parda to ye chhupati hai

zamin dost hai dushman hai aasman mera

zaban wo 'dagh' ke sadqe mein pai hai 'mahmud'

ki shaeri mein nahin koi ham-zaban mera