jahan ne gham diya gham ne mujhe sachchaiyan baKHshin

jahāñ ne ġham diyā ġham ne mujhe sachchā.iyāñ baḳhshīñ

nazar ko vus.ateñ aur fikr ko gahrā.iyāñ baḳhshīñ

karam-farmā.iyāñ ahl-e-jahāñ kī yaad ā.eñgī

dabī choToñ ko mausam ne agar purvā.iyāñ baḳhshīñ

kahāñ aatī thī ahl-e-anjuman kī nāz-bardārī

chalo achchhā huā us ne mujhe tanhā.iyāñ baḳhshīñ

ba-pās-e-vaza-dārī ab bhī un galiyoñ meñ jaatā huuñ

jahāñ ke rahne vāloñ ne mujhe rusvā.iyāñ baḳhshīñ

mirī qismat meñ to likkhe haiñ yaaro dard ġham aañsū

mujhe kab raas ā.eñgī agar shahnā.iyāñ baḳhshīñ

muqayyad the agarche shīsh-mahloñ meñ hasīñ paikar

magar raushan charāġhoñ ne hameñ parchhā.iyāñ baḳhshīñ

tilism-e-be-hisī TuuTā shu.ūr-e-āgahī jaagā

nigāh-e-shauq ne jab husn ko añgḌā.iyāñ baḳhshīñ

hamāre ashk-e-ġham 'tālib' sharāre hī sahī phir bhī

sharāroñ hī ne rū-e-zīst ko ra.anā.iyāñ baḳhshīñ

jahan ne gham diya gham ne mujhe sachchaiyan baKHshin

nazar ko wusaten aur fikr ko gahraiyan baKHshin

karam-farmaiyan ahl-e-jahan ki yaad aaengi

dabi choTon ko mausam ne agar purwaiyan baKHshin

kahan aati thi ahl-e-anjuman ki naz-bardari

chalo achchha hua us ne mujhe tanhaiyan baKHshin

ba-pas-e-waza-dari ab bhi un galiyon mein jata hun

jahan ke rahne walon ne mujhe ruswaiyan baKHshin

meri qismat mein to likkhe hain yaro dard gham aansu

mujhe kab ras aaengi agar shahnaiyan baKHshin

muqayyad the agarche shish-mahlon mein hasin paikar

magar raushan charaghon ne hamein parchhaiyan baKHshin

tilism-e-be-hisi TuTa shuur-e-agahi jaga

nigah-e-shauq ne jab husn ko angDaiyan baKHshin

hamare ashk-e-gham 'talib' sharare hi sahi phir bhi

shararon hi ne ru-e-zist ko ranaiyan baKHshin