jahan nifaq ke shoale milen bujha ke chalo

jahāñ nifāq ke sho.ale mileñ bujhā ke chalo

charāġh amn-o-mohabbat kā tum jalā ke chalo

tumhāre ba.ad bhī ā.eñge qāfile yaaro

mileñ jo raah meñ kāñTe unheñ haTā ke chalo

abhī to kaam inheñ bhī bahut se karne haiñ

numūd-e-sub.h hai sotoñ ko bhī jagā ke chalo

ishāra vaqt kā ye hai ki ai jahāñ vaalo

niyāz-o-nāz kī tafrīq ko miTā ke chalo

bhaTak rahe hoñ jo rāhoñ meñ deñge tum ko duā

bujhe charāġh sar-e-rahguzar jalā ke chalo

tumheñ bhī zindagī-e-jāvedāñ mayassar ho

vafā kī raah meñ dil ko agar miTā ke chalo

mile haiñ hosh-o-ḳhirad is liye tumheñ 'sāqī'

junūñ kī raah meñ hosh-o-ḳhirad luTā ke chalo

jahan nifaq ke shoale milen bujha ke chalo

charagh amn-o-mohabbat ka tum jala ke chalo

tumhaare baad bhi aaenge qafile yaro

milen jo rah mein kanTe unhen haTa ke chalo

abhi to kaam inhen bhi bahut se karne hain

numud-e-subh hai soton ko bhi jaga ke chalo

ishaara waqt ka ye hai ki ai jahan walo

niyaz-o-naz ki tafriq ko miTa ke chalo

bhaTak rahe hon jo rahon mein denge tum ko dua

bujhe charagh sar-e-rahguzar jala ke chalo

tumhein bhi zindagi-e-jawedan mayassar ho

wafa ki rah mein dil ko agar miTa ke chalo

mile hain hosh-o-KHirad is liye tumhein 'saqi'

junun ki rah mein hosh-o-KHirad luTa ke chalo