jahan-panah kahan mera gham samajhte hain

jahāñ-panāh kahāñ merā ġham samajhte haiñ

qalam ke dard ko ahl-e-qalam samajhte haiñ

faqīh-e-shahr kā mansab unhī ko miltā hai

jo qasr-e-shāh ko bāb-e-haram samajhte haiñ

ab apne dard kā ehsās baḌh gayā hai bahut

kisī ke dard ko ab log kam samajhte haiñ

uThāne do unheñ dīvār-e-dushmanī lekin

giregī kaise ye dīvār ham samajhte haiñ

nazar kisī kī taraf hai to dil kisī kī taraf

tirī adā-e-taḳhātub ko ham samajhte haiñ

zamāne dekhe haiñ is aañkh ne jo ab chup hai

ye hoñT talḳhī-e-sahbā-o-sam samajhte haiñ

isī liye to hameñ ġham 'atā kiye us ne

ki us ke ġham kī nazākat ko ham samajhte haiñ

ham ahl-e-shauq haiñ aise hī tishnagāñ meñ 'bashīr'

jo shāḳh-e-gul ko hī dast-e-sanam samajhte haiñ

jahan-panah kahan mera gham samajhte hain

qalam ke dard ko ahl-e-qalam samajhte hain

faqih-e-shahr ka mansab unhi ko milta hai

jo qasr-e-shah ko bab-e-haram samajhte hain

ab apne dard ka ehsas baDh gaya hai bahut

kisi ke dard ko ab log kam samajhte hain

uThane do unhen diwar-e-dushmani lekin

giregi kaise ye diwar hum samajhte hain

nazar kisi ki taraf hai to dil kisi ki taraf

teri ada-e-taKHatub ko hum samajhte hain

zamane dekhe hain is aankh ne jo ab chup hai

ye honT talKHi-e-sahba-o-sam samajhte hain

isi liye to hamein gham 'ata kiye us ne

ki us ke gham ki nazakat ko hum samajhte hain

hum ahl-e-shauq hain aise hi tishnagan mein 'bashir'

jo shaKH-e-gul ko hi dast-e-sanam samajhte hain