جہاں پہ کانوں نے سننے کا فن اتار دیا

جہاں پہ کانوں نے سننے کا فن اتار دیا

وہاں ہماری زباں نے سخن اتار دیا

نہ جانے اب کے یہ کیسی بہار آئی ہے

گلوں کے جسموں سے جس نے چمن اتار دیا

اسی نے ہم سے چھپائی تھی اپنی عریانی

وہ جس کے واسطے ہم نے بدن اتار دیا

لباس عشق پہننے کی ایسی کیا ضد تھی

جو دوستی کا حسیں پیرہن اتار دیا

بنا بتائے ہمیں اک خیال نے پہنا

بنا لحاظ کیے دفعتاً اتار دیا

ہمیں بھی سر پہ چڑھایا تھا فطرتاً سب نے

ہمیں بھی سب کی طرح عادتاً اتار دیا

ہر ایک لاش ہمیں بے کفن نظر آئی

ہماری لاش سے ہم نے کفن اتار دیا