jahan pe phul the aur yaad bhi tumhaari thi

jahāñ pe phuul the aur yaad bhī tumhārī thī

usī paḌāv pe ham ne thakan utārī thī

usī kā aks thā vo chāñd thā ki sūraj thā

magar vo dekhne vaalī nazar hamārī thī

subuk-ḳhirām chalā aur kabhī maiñ Thahrā rahā

ki merī apne hī saa.e se jañg jaarī thī

maiñ apne ḳhvāb ke andar bhī ḳhvāb dekhtā thā

khulī jab aañkh to ik kapkapī sī taarī thī

maiñ us ke dil se jab utrā to zaḳhm aa.e nazar

ki us ke mīThe se lahje meñ sañg-bārī thī

maiñ us ke hijr kī ātish meñ kuchh jalā aise

kaḌā thā din bhī bahut raat mujh pe bhārī thī

maiñ shāḳh-e-dil se uThātā thā phuul girye ke

adū kī aañkh meñ manzar vo tez aarī thī

jahan pe phul the aur yaad bhi tumhaari thi

usi paDaw pe hum ne thakan utari thi

usi ka aks tha wo chand tha ki suraj tha

magar wo dekhne wali nazar hamari thi

subuk-KHiram chala aur kabhi main Thahra raha

ki meri apne hi sae se jang jari thi

main apne KHwab ke andar bhi KHwab dekhta tha

khuli jab aankh to ek kapkapi si tari thi

main us ke dil se jab utra to zaKHm aae nazar

ki us ke miThe se lahje mein sang-bari thi

main us ke hijr ki aatish mein kuchh jala aise

kaDa tha din bhi bahut raat mujh pe bhaari thi

main shaKH-e-dil se uThata tha phul girye ke

adu ki aankh mein manzar wo tez aari thi