jahan sawal KHushi na-KHushi ka aa jae

jahāñ savāl ḳhushī nā-ḳhushī kā aa jaa.e

ḳhamoshiyoñ meñ vahāñ mudda.ā kahā jaa.e

dil-o-nazar ke ujāle dikhā.eñge rāheñ

chale chalo ki jahāñ tak ye silsilā jaa.e

mile panāh na alfāz meñ ġham-e-dil ko

koī sune bhī to kyūñkar bayāñ kiyā jaa.e

nashāt-e-dīd na ho bā.is-e-shikast-e-nazar

nigāh-e-dil meñ koī is adā se aa jaa.e

ye faisla bhī to hotā nazar nahīñ aatā

parāyā kaun hai apnā kise kahā jaa.e

palaT palaT ke nazāroñ ko dekhne vaalā

qadam qadam pe nazar ko sañbhāltā jaa.e

udhar vo un kī nazar kaif-o-imbisāt-angez

idhar ye dil ki ba-har-lamha TūTtā jaa.e

hazār vaj.h-e-nadāmat ho ye ravish lekin

ḳhulūs-e-dil kā 'rishī' haq adā kiyā jaa.e

jahan sawal KHushi na-KHushi ka aa jae

KHamoshiyon mein wahan muddaa kaha jae

dil-o-nazar ke ujale dikhaenge rahen

chale chalo ki jahan tak ye silsila jae

mile panah na alfaz mein gham-e-dil ko

koi sune bhi to kyunkar bayan kiya jae

nashat-e-did na ho bais-e-shikast-e-nazar

nigah-e-dil mein koi is ada se aa jae

ye faisla bhi to hota nazar nahin aata

paraya kaun hai apna kise kaha jae

palaT palaT ke nazaron ko dekhne wala

qadam qadam pe nazar ko sanbhaalta jae

udhar wo un ki nazar kaif-o-imbisat-angez

idhar ye dil ki ba-har-lamha TuTta jae

hazar wajh-e-nadamat ho ye rawish lekin

KHulus-e-dil ka 'rishi' haq ada kiya jae