jahan se be-talluq aap se begana ho jae

jahāñ se be-ta.alluq aap se begāna ho jaa.e

baḌā hoshiyār hai vo jo tirā dīvāna ho jaa.e

raheñ baaqī na us ke hosh vo dīvāna ho jaa.e

karam jis par tirā ai jalva-e-jānāna ho jaa.e

na kyuuñ vo be-niyāz-e-shīsha-o-paimāna ho jaa.e

tumhārī mast mast āñkhoñ kā jo mastāna ho jaa.e

adā-o-nāz aur andāz kā shaidā na ho jaa.e

mirā nāzoñ kā paalā dil kahīñ un kā na ho jaa.e

jabīn-e-shauq ho sañg-e-dar-e-jānāñ se mas aisī

jabīn-e-shauq hī sañg-e-dar-e-jānāñ na ho jaa.e

haqīqat meñ vahī dil mustahiq hai dil dukhāne kā

tirī sham-e-ruḳh-e-raushan kā jo parvāna ho jaa.e

karāmat piine vāloñ kī abhī dekhī nahīñ vaa.iz

jahāñ jam jaa.eñ bāda-kash vahīñ paimāna ho jaa.e

sadā-e-'sābir'-e-ġhamgīñ sunī jab apne kūche meñ

kahā ki kyā kareñ koī agar dīvāna ho jaa.e

jahan se be-talluq aap se begana ho jae

baDa hoshiyar hai wo jo tera diwana ho jae

rahen baqi na us ke hosh wo diwana ho jae

karam jis par tera ai jalwa-e-jaanana ho jae

na kyun wo be-niyaz-e-shisha-o-paimana ho jae

tumhaari mast mast aankhon ka jo mastana ho jae

ada-o-naz aur andaz ka shaida na ho jae

mera nazon ka pala dil kahin un ka na ho jae

jabin-e-shauq ho sang-e-dar-e-jaanan se mas aisi

jabin-e-shauq hi sang-e-dar-e-jaanan na ho jae

haqiqat mein wahi dil mustahiq hai dil dukhane ka

teri sham-e-ruKH-e-raushan ka jo parwana ho jae

karamat pine walon ki abhi dekhi nahin waiz

jahan jam jaen baada-kash wahin paimana ho jae

sada-e-'sabir'-e-ghamgin suni jab apne kuche mein

kaha ki kya karen koi agar diwana ho jae