jahan se haarne par dosto aisa bhi hota hai

jahāñ se hārne par dosto aisā bhī hotā hai

haqīqat chhoḌ kar insāñ yahāñ sapnoñ meñ khotā hai

charāġhoñ kī hamesha qadr hotī hai añdheroñ meñ

zamāna juuñ kisī ke chhoḌ kar jaane pe rotā hai

kabhī rutba diyā yāroñ ko gul-daste ke phūloñ kā

sajā kar phir na.e phūloñ ko tū rishte Dubotā hai

ġhalat kuchh kaam insāñ zindagī meñ kar bhī le to kyā

hameñ ye dekhnā hai kyā use afsos hotā hai

kahāñ dikhtā hai ham ko kyā guzartī hai kisānoñ par

kamī aksar samar kī Dar zarar kā le ke sotā hai

vo pāyal paañv meñ tere vo biñdī tere māthe par

tasavvur bas yahī aksar merī āñkhoñ meñ hotā hai

samajh ye haal hai terā ye mustaqbil bhī terā hai

qadam aage baḌā 'hāsil' tū kyoñ maazī pe rotā hai

jahan se haarne par dosto aisa bhi hota hai

haqiqat chhoD kar insan yahan sapnon mein khota hai

charaghon ki hamesha qadr hoti hai andheron mein

zamana jun kisi ke chhoD kar jaane pe rota hai

kabhi rutba diya yaron ko gul-daste ke phulon ka

saja kar phir nae phulon ko tu rishte Dubota hai

ghalat kuchh kaam insan zindagi mein kar bhi le to kya

hamein ye dekhna hai kya use afsos hota hai

kahan dikhta hai hum ko kya guzarti hai kisanon par

kami aksar samar ki Dar zarar ka le ke sota hai

wo payal panw mein tere wo bindi tere mathe par

tasawwur bas yahi aksar meri aankhon mein hota hai

samajh ye haal hai tera ye mustaqbil bhi tera hai

qadam aage baDa 'hasil' tu kyon mazi pe rota hai