jahan se hota hai pyare KHuda ka nam shurua

jahāñ se hotā hai pyāre ḳhudā kā naam shurūa

vahīñ se karte ham zindagī kā kaam shurūa

ye kaisī rāh-e-safar hai ye kaisā aalam hai

ki paañv rakkheñ jahāñ bhī vahīñ maqām shurūa

jahāñ pe hotā hai dil pe nuzūl-e-bār-e-azāb

vahīñ se hotā hai duniyā kā ye nizām shurūa

na socho vaqt bahut kam hai zindagī kam hai

jo ho sake to karo gardish-e-mudām shurūa

sukūt o shor ke mābain koī hai maujūd

jahāñ ho ḳhatm samā.at vahīñ kalām shurūa

baḌī ajiib hai ye dāstān-e-ishq 'hamesh'

saverā hone se pahle ho goyā shaam shurūa

jahan se hota hai pyare KHuda ka nam shurua

wahin se karte hum zindagi ka kaam shurua

ye kaisi rah-e-safar hai ye kaisa aalam hai

ki panw rakkhen jahan bhi wahin maqam shurua

jahan pe hota hai dil pe nuzul-e-bar-e-azab

wahin se hota hai duniya ka ye nizam shurua

na socho waqt bahut kam hai zindagi kam hai

jo ho sake to karo gardish-e-mudam shurua

sukut o shor ke mabain koi hai maujud

jahan ho KHatm samaat wahin kalam shurua

baDi ajib hai ye dastan-e-ishq 'hamesh'

sawera hone se pahle ho goya sham shurua