جہاں تم جلوہ فرما تھے وہاں پردہ نشیں میں تھا

جہاں تم جلوہ فرما تھے وہاں پردہ نشیں میں تھا

مجھے دیکھا نہیں تم نے وہیں تم تھے وہیں میں تھا

محبت کار فرما جب ہوئی تو مل گئے ورنہ

محبت جب نہ تھی تم سے کہیں تم تھے کہیں میں تھا

وہ آخر کون تھا موسیٰ سے پہلے دیکھنے والا

ازل میں تم ہوئے تھے جلوہ گر تو جلوہ بیں میں تھا

جہان آب و گل میں میری رفعت پوچھنے والے

یہ کل کی بات ہے کل ساکن خلد بریں میں تھا

میں غم ناک ازل روتا ہوا آیا تھا دنیا میں

مآل زیست پر اپنے رساؔ اندوہ گیں میں تھا