جہاں اس کے جلوے سے معمور ہے

جہاں اس کے جلوے سے معمور ہے

جدھر دیکھیے نور ہی نور ہے

رگ جاں سے بھی ہے وہ نزدیک تر

نگاہوں سے ہر چند مشہور ہے

شہنشاہ تو ہی ہے اے ذوالجلال

ترا بندہ قیصر ہے مغفور ہے

بندھی ہے ہر اک دل میں تیری ہی دھن

ہر اک لب پہ تیرا ہی مذکور ہے

ترا جلوہ رگ رگ میں ہے مثل خوں

ترے نور سے آنکھ پر نور ہے

ترے شکر کا حق ادا کس سے ہو

کہاں آدمی کا یہ مقدور ہے

تعقل کی سرحد سے باہر ہے تو

احاطے سے ادراک کے دور ہے

ترا نور وحدت تغیر سے پاک

تلون مظاہر کا دستور ہے

ترے فضل کا ملتجی ہے خیالؔ

مہینوں سے بیچارہ رنجور ہے