jahan wo zulf-e-barham kargar mahsus hoti hai

jahāñ vo zulf-e-barham kārgar mahsūs hotī hai

vahāñ Dhaltī huī har dopahar mahsūs hotī hai

vahī shai maqsad-e-qalb-o-nazar mahsūs hotī hai

kamī jis kī barābar umr bhar mahsūs hotī hai

jatan bhī kyā hasīñ sūjhā hai tujh ko pyaar karne kā

tirī sūrat mujhe apnī nazar mahsūs hotī hai

galī kūchoñ meñ sehn-e-mai-kada kā rañg hotā hai

mujhe duniyā tirā kaif-e-nazar mahsūs hotī hai

zarā aage chaloge to izāfa ilm meñ hogā

mohabbat pahle pahle be-zarar mahsūs hotī hai

ye do patthar na jaane kab se aapas meñ haiñ vābasta

jabīñ apnī tumhārā sañg-e-dar mahsūs hotī hai

kabhī sach to nahīñ us aañkh ne bolā magar phir bhī

ravayye meñ nihāyat mo'atabar mahsūs hotī hai

adam ab dostoñ kī be-ruḳhī kī hai ye kaifiyyat

khaTaktī to nahīñ itnī magar mahsūs hotī hai

jahan wo zulf-e-barham kargar mahsus hoti hai

wahan Dhalti hui har dopahar mahsus hoti hai

wahi shai maqsad-e-qalb-o-nazar mahsus hoti hai

kami jis ki barabar umr bhar mahsus hoti hai

jatan bhi kya hasin sujha hai tujh ko pyar karne ka

teri surat mujhe apni nazar mahsus hoti hai

gali kuchon mein sehn-e-mai-kada ka rang hota hai

mujhe duniya tera kaif-e-nazar mahsus hoti hai

zara aage chaloge to izafa ilm mein hoga

mohabbat pahle pahle be-zarar mahsus hoti hai

ye do patthar na jaane kab se aapas mein hain wabasta

jabin apni tumhaara sang-e-dar mahsus hoti hai

kabhi sach to nahin us aankh ne bola magar phir bhi

rawayye mein nihayat mo'atabar mahsus hoti hai

adam ab doston ki be-ruKHi ki hai ye kaifiyyat

khaTakti to nahin itni magar mahsus hoti hai