jaisa hun waisa kyun hun samjha sakta tha main

jaisā huuñ vaisā kyuuñ huuñ samjhā saktā thā maiñ

tum ne pūchhā to hotā batlā saktā thā maiñ

āsūda rahne kī ḳhvāhish maar ga.ī varna

aage aur bahut aage tak jā saktā thā maiñ

chhoTī-moTī ek lahar hī thī mere andar

ek lahar se kyā tūfān uThā saktā thā maiñ

kahīñ kahīñ se kuchh misre ek-ādh ġhazal kuchh sher

is pūñjī par kitnā shor machā saktā thā maiñ

jaise sab likhte rahte haiñ ġhazleñ nazmeñ giit

vaise likh likh kar ambār lagā saktā thā maiñ

jaisa hun waisa kyun hun samjha sakta tha main

tum ne puchha to hota batla sakta tha main

aasuda rahne ki KHwahish mar gai warna

aage aur bahut aage tak ja sakta tha main

chhoTi-moTi ek lahar hi thi mere andar

ek lahar se kya tufan uTha sakta tha main

kahin kahin se kuchh misre ek-adh ghazal kuchh sher

is punji par kitna shor macha sakta tha main

jaise sab likhte rahte hain ghazlen nazmen git

waise likh likh kar ambar laga sakta tha main