jaisa jaisa humne chaha waisa waisa ho gaya

jaisā jaisā ham ne chāhā vaisā vaisā ho gayā

dhīre dhīre haule haule rafta-rafta ho gayā

ab mohabbat bhī nahīñ hai aur shikāyat bhī nahīñ

baat maano yā na maano lekin aisā ho gayā

dekhte hī dekhte ahbāb ruḳhsat ho ga.e

dekhte hī dekhte jag meñ añdherā ho gayā

kis qadar shaffāf thā jab tak tirī āñkhoñ meñ thā

aa.ine tak aate aate 'aks mailā ho gayā

kaun kah saktā hai dil meñ aag kis lamhe lagī

pal do pal ke khel meñ ik pal ziyāda ho gayā

kis taraf se raat aa.ī kis taraf le ke ga.ī

maiñ ne to cigarette jalā.ī aur saverā ho gayā

munfarid hotā to mujh ko kyoñ koī pahchāntā

sach to ye hai maiñ bhī 'āmir' sab ke jaisā ho gayā

jaisa jaisa hum ne chaha waisa waisa ho gaya

dhire dhire haule haule rafta-rafta ho gaya

ab mohabbat bhi nahin hai aur shikayat bhi nahin

baat mano ya na mano lekin aisa ho gaya

dekhte hi dekhte ahbab ruKHsat ho gae

dekhte hi dekhte jag mein andhera ho gaya

kis qadar shaffaf tha jab tak teri aankhon mein tha

aaine tak aate aate 'aks maila ho gaya

kaun kah sakta hai dil mein aag kis lamhe lagi

pal do pal ke khel mein ek pal ziyaada ho gaya

kis taraf se raat aai kis taraf le ke gai

main ne to cigarette jalai aur sawera ho gaya

munfarid hota to mujh ko kyon koi pahchanta

sach to ye hai main bhi 'amir' sab ke jaisa ho gaya