jaise KHamosh-bayani ko bayan hone mein

jaise ḳhāmosh-bayānī ko bayāñ hone meñ

'umr lagtī hai yahāñ zamzama-ḳhvāñ hone meñ

itnā āsāñ na samajh jaan nikal jaatī hai

rāh-e-pur-ḳhār pe is tarh ravāñ hone meñ

aañkh khulte hī sukūt-e-shab-e-hijrāñ ne kahā

ek lamha hai bahut ḳhvāb dhuāñ hone meñ

kin marāhil se guzartā huā pohñchā hai yahāñ

zabt se pūchh jo guzrī hai fuġhāñ hone meñ

is se behtar thā ki taslīm na honā kartā

ḳhud ko be-sarfa kiyā sarf-e-jahāñ hone meñ

zindagī biit ga.ī jis ko banāte hue ghar

ek lamha na lagā us ko makāñ hone meñ

aur kuchh der meñ sūraj bhī nikal aa.egā

aur kuchh der hī baaqī hai azaañ hone meñ

jaise KHamosh-bayani ko bayan hone mein

'umr lagti hai yahan zamzama-KHwan hone mein

itna aasan na samajh jaan nikal jati hai

rah-e-pur-KHar pe is tarh rawan hone mein

aankh khulte hi sukut-e-shab-e-hijran ne kaha

ek lamha hai bahut KHwab dhuan hone mein

kin marahil se guzarta hua pohncha hai yahan

zabt se puchh jo guzri hai fughan hone mein

is se behtar tha ki taslim na hona karta

KHud ko be-sarfa kiya sarf-e-jahan hone mein

zindagi bit gai jis ko banate hue ghar

ek lamha na laga us ko makan hone mein

aur kuchh der mein suraj bhi nikal aaega

aur kuchh der hi baqi hai azan hone mein