جیسے خاموش بیانی کو بیاں ہونے میں

جیسے خاموش بیانی کو بیاں ہونے میں

عمر لگتی ہے یہاں زمزمہ خواں ہونے میں

اتنا آساں نہ سمجھ جان نکل جاتی ہے

راہ پرخار پہ اس طرح رواں ہونے میں

آنکھ کھلتے ہی سکوت شب ہجراں نے کہا

ایک لمحہ ہے بہت خواب دھواں ہونے میں

کن مراحل سے گزرتا ہوا پہنچا ہے یہاں

ضبط سے پوچھ جو گزری ہے فغاں ہونے میں

اس سے بہتر تھا کہ تسلیم نہ ہونا کرتا

خود کو بے صرفہ کیا صرف جہاں ہونے میں

زندگی بیت گئی جس کو بناتے ہوئے گھر

ایک لمحہ نہ لگا اس کو مکاں ہونے میں

اور کچھ دیر میں سورج بھی نکل آئے گا

اور کچھ دیر ہی باقی ہے اذاں ہونے میں