jaise koi rabt nahin ho jaise hon anjaane log

jaise koī rabt nahīñ ho jaise hoñ anjāne log

kyā se kyā ho jaate haiñ aksar jāne-pahchāne log

muñh se baat nikalte hī sau gaḌh leñge afsāne log

baiThe-baiThe bun lete haiñ kaise tāne-bāne log

dair-o-haram hī se duniyā ko hosh kī rāheñ miltī haiñ

dair-o-haram ke naam pe hī ban jaate haiñ dīvāne log

koī unheñ bhī to samjhā.e koī kuchh un se bhī kahe

jab dekho tab aa jaate haiñ mujh ko hī samjhāne log

hazrat-e-zāhid samjhā deñ to tauba kar luuñ maiñ bhī 'ra.īs'

bādal kyoñ chhā jaate haiñ jab jaate haiñ maiḳhāne log

jaise koi rabt nahin ho jaise hon anjaane log

kya se kya ho jate hain aksar jaane-pahchane log

munh se baat nikalte hi sau gaDh lenge afsane log

baiThe-baiThe bun lete hain kaise tane-bane log

dair-o-haram hi se duniya ko hosh ki rahen milti hain

dair-o-haram ke nam pe hi ban jate hain diwane log

koi unhen bhi to samjhae koi kuchh un se bhi kahe

jab dekho tab aa jate hain mujh ko hi samjhane log

hazrat-e-zahid samjha den to tauba kar lun main bhi 'rais'

baadal kyon chha jate hain jab jate hain maiKHane log