jaise tazad hota hai lail-o-nahaar mein

jaise tazād hotā hai lail-o-nahār meñ

vaisā hī farq hotā hai qaul-o-qarār meñ

tum hī batāo kyā hai mire iḳhtiyār meñ

maiñ is bisāt-e-dahr pe huuñ kisī shumār meñ

kyā jaane kyā kashish hai ye musht-e-ġhubār meñ

jakḌe hue sabhī haiñ ġham-e-rozgār meñ

taḌpā hai ḳhuub māhī-e-be-āb kī tarah

ab bhī dil-e-hazīñ haiñ tire intizār meñ

mahsūs kar rahe haiñ magar bolte nahīñ

tabdīliyāñ jo aa.ī haiñ kirdār-e-yār meñ

ye inqalāb dekhā hai daur-e-jadīd kā

ġhaddār ḳhud ko ginte haiñ ab jāñ-nisār meñ

'maqsūd' vo bhī bahr-e-mulāqāt ā.eñge

pathrā ga.ī haiñ āñkheñ isī intizār meñ

jaise tazad hota hai lail-o-nahaar mein

waisa hi farq hota hai qaul-o-qarar mein

tum hi batao kya hai mere iKHtiyar mein

main is bisat-e-dahr pe hun kisi shumar mein

kya jaane kya kashish hai ye musht-e-ghubar mein

jakDe hue sabhi hain gham-e-rozgar mein

taDpa hai KHub mahi-e-be-ab ki tarah

ab bhi dil-e-hazin hain tere intizar mein

mahsus kar rahe hain magar bolte nahin

tabdiliyan jo aai hain kirdar-e-yar mein

ye inqalab dekha hai daur-e-jadid ka

ghaddar KHud ko ginte hain ab jaan-nisar mein

'maqsud' wo bhi bahr-e-mulaqat aaenge

pathra gai hain aankhen isi intizar mein