jaisi honi ho wo raftar nahin bhi hoti

jaisī honī ho vo raftār nahīñ bhī hotī

raah is samt kī hamvār nahīñ bhī hotī

maiñ tahī-dast laḌā.ī ke hunar sīkhtā huuñ

kabhī is haath meñ talvār nahīñ bhī hotī

phir bhī ham log the rasmoñ meñ aqīdoñ meñ judā

gar yahāñ biich meñ dīvār nahīñ bhī hotī

vo mirī zaat se inkār kiye rakhtā hai

gar kabhī sūrat-e-inkār nahīñ bhī hotī

jis ko bekār samajh kar kisī kone meñ rakheñ

aisā hotā hai ki bekār nahīñ bhī hotī

dil kisī bazm meñ jaate hī machaltā hai 'ḳhayāl'

so tabī.at kahīñ be-zār nahīñ bhī hotī

jaisi honi ho wo raftar nahin bhi hoti

rah is samt ki hamwar nahin bhi hoti

main tahi-dast laDai ke hunar sikhta hun

kabhi is hath mein talwar nahin bhi hoti

phir bhi hum log the rasmon mein aqidon mein juda

gar yahan bich mein diwar nahin bhi hoti

wo meri zat se inkar kiye rakhta hai

gar kabhi surat-e-inkar nahin bhi hoti

jis ko bekar samajh kar kisi kone mein rakhen

aisa hota hai ki bekar nahin bhi hoti

dil kisi bazm mein jate hi machalta hai 'KHayal'

so tabiat kahin be-zar nahin bhi hoti