jal gaya KHak hua kab ka wo parwana-e-dil

jal gayā ḳhaak huā kab kā vo parvāna-e-dil

ḳhatm hotā nahīñ ab tak magar afsāna-e-dil

hashr ke din pe uThā rakh ki baḌā saudā hai

ālam-e-husn se mumkin nahīñ bai.āna-e-dil

aap kī ik nigah-e-nāz use chhalkā detī

qābil-e-sharbat-e-dīdār thā paimāna-e-dil

ham jabhī samjhe the anjām ki jab fitrat ne

ḳhaak aur ḳhuun se tayyār kiyā ḳhāna-e-dil

jalne vaale se alag ho ga.e ham-mashrab-e-jāñ

de ke aag uTh ga.ī vo sohbat-e-rindāna-e-dil

tishna-e-jām-e-mohabbat se hamīñ vāqif haiñ

qadr kyā un ko jo toḌā kiye paimāna-e-dil

dohrī zanjīroñ meñ jakḌā hai muqaddar ne mujhe

us kā dīvāna hai dil aur maiñ dīvāna-e-dil

zabt kartā huuñ magar Dar hai ki shām-e-ġham meñ

kahīñ tañg aa ke na khul jaa.e sulah-ḳhāna-e-dil

ab to qatra nahīñ haañ vo bhī kabhī din the ki ham

mast ho jaate the ḳhud dekh ke mai-ḳhāna-e-dil

jā-e-ummīd-o-tamannā kā patā miltā hai

ab bhī dilkash hai mire vāste vīrāna-e-dil

hai to miTTī kā magar qudarat-e-ḳhāliq bhī hai

husn vaale na banā leñ koī paimāna-e-dil

dekh kar tafraqa-e-mehr-o-jafā ham samjhe

ek hī vaz.a kā bantā nahīñ kāshāna-e-dil

kā.enāt-e-do-jahāñ paas hai phir tañg nahīñ

aur bhī kuchh ho to ḳhālī hai abhī ḳhāna-e-dil

ruḳh-e-rañgīn-e-hasīñ ek chaman hai lekin

rauñdne ke liye ho sabza-e-begāna-e-dil

husn hai ḳhud haiñ zamāna hai vo kyuuñ ghabrā.eñ

aur yahāñ kyā hai magar haañ vahī vīrāna-e-dil

miT ke tasvīr-e-ḳharābāt hai ab to varna

ka.aba kahte the sab aisā thā sanam-ḳhāna-e-dil

kahiye qissa koī arbāb-e-vafā kā 'sāqib'

chhoḌiye zikr jafā kā ki hai begāna-e-dil

jal gaya KHak hua kab ka wo parwana-e-dil

KHatm hota nahin ab tak magar afsana-e-dil

hashr ke din pe uTha rakh ki baDa sauda hai

aalam-e-husn se mumkin nahin baiana-e-dil

aap ki ek nigah-e-naz use chhalka deti

qabil-e-sharbat-e-didar tha paimana-e-dil

hum jabhi samjhe the anjam ki jab fitrat ne

KHak aur KHun se tayyar kiya KHana-e-dil

jalne wale se alag ho gae ham-mashrab-e-jaan

de ke aag uTh gai wo sohbat-e-rindana-e-dil

tishna-e-jam-e-mohabbat se hamin waqif hain

qadr kya un ko jo toDa kiye paimana-e-dil

dohri zanjiron mein jakDa hai muqaddar ne mujhe

us ka diwana hai dil aur main diwana-e-dil

zabt karta hun magar Dar hai ki sham-e-gham mein

kahin tang aa ke na khul jae sulah-KHana-e-dil

ab to qatra nahin han wo bhi kabhi din the ki hum

mast ho jate the KHud dekh ke mai-KHana-e-dil

ja-e-ummid-o-tamanna ka pata milta hai

ab bhi dilkash hai mere waste virana-e-dil

hai to miTTi ka magar qudarat-e-KHaliq bhi hai

husn wale na bana len koi paimana-e-dil

dekh kar tafraqa-e-mehr-o-jafa hum samjhe

ek hi waza ka banta nahin kashana-e-dil

kaenat-e-do-jahan pas hai phir tang nahin

aur bhi kuchh ho to KHali hai abhi KHana-e-dil

ruKH-e-rangin-e-hasin ek chaman hai lekin

raundne ke liye ho sabza-e-begana-e-dil

husn hai KHud hain zamana hai wo kyun ghabraen

aur yahan kya hai magar han wahi virana-e-dil

miT ke taswir-e-KHarabaat hai ab to warna

kaba kahte the sab aisa tha sanam-KHana-e-dil

kahiye qissa koi arbab-e-wafa ka 'saqib'

chhoDiye zikr jafa ka ki hai begana-e-dil