jal gaya sara asasa pai pai jal gai

jal gayā saarā asāsa paa.ī paa.ī jal ga.ī

bach gayā merā hunar saarī kamā.ī jal ga.ī

valvala-angez taqrīroñ kā saudā ho gayā

ohda-o-mansab milā sho.ala-navā.ī jal ga.ī

shab kī bedārī ko jaane khā ga.ī kis kī nazar

phañs ga.e duniyā meñ saarī pārsā.ī jal ga.ī

hādsoñ kī nazr ho kar rah ga.ī āñkhoñ kī niiñd

jis se rishta thā thakan kā vo chaTā.ī jal ga.ī

jo ba-andāz-e-ḳhudā sab kī zabāñ kartā thā band

sho.ala-e-tanqīd se us kī ḳhudā.ī jal ga.ī

bach ga.e afrād ghar ke ye ḳhushī to hai magar

is kā ġham hai maañ barābar būḌhī daa.ī jal ga.ī

ham ne 'ahsan' dil meñ kyā kyā soch rakkhā thā magar

ātish-e-ġhurbat meñ bachchoñ kī paḌhā.ī jal ga.ī

jal gaya sara asasa pai pai jal gai

bach gaya mera hunar sari kamai jal gai

walwala-angez taqriron ka sauda ho gaya

ohda-o-mansab mila shoala-nawai jal gai

shab ki bedari ko jaane kha gai kis ki nazar

phans gae duniya mein sari parsai jal gai

hadson ki nazr ho kar rah gai aankhon ki nind

jis se rishta tha thakan ka wo chaTai jal gai

jo ba-andaz-e-KHuda sab ki zaban karta tha band

shoala-e-tanqid se us ki KHudai jal gai

bach gae afrad ghar ke ye KHushi to hai magar

is ka gham hai man barabar buDhi dai jal gai

hum ne 'ahsan' dil mein kya kya soch rakkha tha magar

aatish-e-ghurbat mein bachchon ki paDhai jal gai