jala diya hai ki isne bujha diya hai mujhe

jalā diyā hai ki is ne bujhā diyā hai mujhe

pa dil kī aag ne kandan banā diyā hai mujhe

tirī talab kī atā hai ki jis ne misl-e-charāġh

havā-e-dahr meñ jalnā sikhā diyā hai mujhe

maiñ sab se duur faqat apne aap meñ gum thā

kisī ke qurb ne sab se milā diyā hai mujhe

maiñ ek zarra-e-nāchīz kā.enāt meñ thā

ye kā.enāt sā kis ne banā diyā hai mujhe

so ab maiñ ohda-e-duniyā se kyā ġharaz rakhūñ

kisī ne mansab-e-dil par biThā diyā hai mujhe

tamām umr jo rakkhegā ziist ko raushan

tirī nazar ne vo manzar dikhā diyā hai mujhe

maiñ ek dasht thā ḳhud apne hī sarāb meñ gum

bas ek mauj ne dariyā banā diyā hai mujhe

jala diya hai ki is ne bujha diya hai mujhe

pa dil ki aag ne kandan bana diya hai mujhe

teri talab ki ata hai ki jis ne misl-e-charagh

hawa-e-dahr mein jalna sikha diya hai mujhe

main sab se dur faqat apne aap mein gum tha

kisi ke qurb ne sab se mila diya hai mujhe

main ek zarra-e-nachiz kaenat mein tha

ye kaenat sa kis ne bana diya hai mujhe

so ab main ohda-e-duniya se kya gharaz rakhun

kisi ne mansab-e-dil par biTha diya hai mujhe

tamam umr jo rakkhega zist ko raushan

teri nazar ne wo manzar dikha diya hai mujhe

main ek dasht tha KHud apne hi sarab mein gum

bas ek mauj ne dariya bana diya hai mujhe