jala ke daman-e-hasti ka tar tar uTha

jalā ke dāman-e-hastī kā taar taar uThā

kabhī jo nāla-e-ġham dil se sho.ala-bār uThā

ḳhyāl-o-fikr-o-tamannā kā ḳhuun chhup na sakā

zabāñ ḳhamosh thī lekin lahū pukār uThā

falak pe jab bhī haqā.eq kī surḳhiyāñ ubhrīñ

zamīñ se kohna rivāyāt kā ġhubār uThā

ravāñ-davāñ hai rag-e-sañg meñ lahū kī tarah

vo zindagī kā talātum jo baar baar uThā

rah-e-hayāt meñ jab Dagmagā.e mere qadam

mirā hī naqsh-e-kaf-e-pā mujhe pukār uThā

fareb-e-vāda-e-fardā kā zikr kyā kiije

vo mo'atabar hī the kab jin kā e'tibār uThā

'farīd' ahl-e-gulistāñ bhī hosh kho baiThe

kuchh is adā se hijāb-e-ruḳh-e-bahār uThā

jala ke daman-e-hasti ka tar tar uTha

kabhi jo nala-e-gham dil se shoala-bar uTha

KHyal-o-fikr-o-tamanna ka KHun chhup na saka

zaban KHamosh thi lekin lahu pukar uTha

falak pe jab bhi haqaeq ki surKHiyan ubhrin

zamin se kohna riwayat ka ghubar uTha

rawan-dawan hai rag-e-sang mein lahu ki tarah

wo zindagi ka talatum jo bar bar uTha

rah-e-hayat mein jab Dagmagae mere qadam

mera hi naqsh-e-kaf-e-pa mujhe pukar uTha

fareb-e-wada-e-farda ka zikr kya kije

wo mo'atabar hi the kab jin ka e'tibar uTha

'farid' ahl-e-gulistan bhi hosh kho baiThe

kuchh is ada se hijab-e-ruKH-e-bahaar uTha