jala ke sham se is tarh mat bhula diya kar

jalā ke shaam se is tarh mat bhulā diyā kar

charāġh huuñ maiñ mujhe sub.h meñ bujhā diyā kar

zamīn-e-'ishq se kaT kar maiñ rah nahīñ saktā

mujhe ukhāḌ magar phir vahīñ lagā diyā kar

gale lagā ke mujhe pyaar kar jhagaḌ mujh se

tū merā hai to mujhe hone kā patā diyā kar

maiñ terī raakh meñ chingāriyoñ sā rahtā huuñ

so jal paḌūñgā kisī din mujhe havā diyā kar

tire baġhair mirā jī kahīñ nahīñ lagtā

tū mere saath rahā kar mujhe mazā diyā kar

bikharnā ho to mujhe sang kar liyā kar tū

sañvarnā ho to mujhe aa.ina banā diyā kar

maiñ chāhtā huuñ ki baT jaa.eñ tere sub.h ke kaam

agar maiñ soyā rahūñ to mujhe jagā diyā kar

tamām din maiñ guzārūñ tire ḳhumār ke saath

maiñ ghar se chalne lagūñ to mujhe nasha diyā kar

chhupā ke apnī nigāhoñ meñ har ghaḌī mat rakh

kabhī-kabhār mujhe tū kahīñ gañvā diyā kar

maiñ tere paas bahut thak-thakā ke aatā huuñ

tū apnī god meñ le ke mujhe sulā diyā kar

jala ke sham se is tarh mat bhula diya kar

charagh hun main mujhe subh mein bujha diya kar

zamin-e-'ishq se kaT kar main rah nahin sakta

mujhe ukhaD magar phir wahin laga diya kar

gale laga ke mujhe pyar kar jhagaD mujh se

tu mera hai to mujhe hone ka pata diya kar

main teri rakh mein chingariyon sa rahta hun

so jal paDunga kisi din mujhe hawa diya kar

tere baghair mera ji kahin nahin lagta

tu mere sath raha kar mujhe maza diya kar

bikharna ho to mujhe sang kar liya kar tu

sanwarna ho to mujhe aaina bana diya kar

main chahta hun ki baT jaen tere subh ke kaam

agar main soya rahun to mujhe jaga diya kar

tamam din main guzarun tere KHumar ke sath

main ghar se chalne lagun to mujhe nasha diya kar

chhupa ke apni nigahon mein har ghaDi mat rakh

kabhi-kabhaar mujhe tu kahin ganwa diya kar

main tere pas bahut thak-thaka ke aata hun

tu apni god mein le ke mujhe sula diya kar