jalae baiTha hai har koi aagahi ka charagh

jalā.e baiThā hai har koī āgahī kā charāġh

ujālā detā hai lekin kisī kisī kā charāġh

hamāre pīchhe jalā.e na kyoñ vo ghī kā charāġh

hamāre sāmne jaltā nahīñ kisī kā charāġh

jo tel Daal rahā hai use nahīñ mā'lūm

usī ke ghar ko jalā.egā kal usī kā charāġh

hamāre baa'd koī sar-phirā na aa.egā

hamārī raah takegā tirī galī kā charāġh

koī bharosa nahīñ kab ye daaġh de jaa.e

havā kī zad pe musalsal hai zindagī kā charāġh

gumān hotā hai rah rah ke us ke bujhne kā

bhaḌaktā rahtā hai har vaqt muflisī kā charāġh

'shakīl' ham ko añdheroñ se Dar nahīñ lagtā

ḳhudā ke fazl se raushan hai āgahī kā charāġh

jalae baiTha hai har koi aagahi ka charagh

ujala deta hai lekin kisi kisi ka charagh

hamare pichhe jalae na kyon wo ghi ka charagh

hamare samne jalta nahin kisi ka charagh

jo tel Dal raha hai use nahin ma'lum

usi ke ghar ko jalaega kal usi ka charagh

hamare ba'd koi sar-phira na aaega

hamari rah takega teri gali ka charagh

koi bharosa nahin kab ye dagh de jae

hawa ki zad pe musalsal hai zindagi ka charagh

guman hota hai rah rah ke us ke bujhne ka

bhaDakta rahta hai har waqt muflisi ka charagh

'shakil' hum ko andheron se Dar nahin lagta

KHuda ke fazl se raushan hai aagahi ka charagh