jalan dil ki likkhen jo hum dil-jale

jalan dil kī likkheñ jo ham dil-jale

zabān-e-qalam meñ paḌeñ aable

rah-e-sa.ab-e-ulfat meñ ghabrā na dil

bahut aise pesh ā.eñge marhale

na din vo tumhāre na apnā vo sin

tumhāre hamāre vo din sin Dhale

'adam kī bhī kyā raah hai be-nazīr

chale jaate haiñ pesh-o-pas qāfile

vo ab nīmchā kar chuke haiñ alam

ajal aa chukī sar pe kyūñ-kar Tale

Thahar jā koī dam ke mehmān haiñ

ḳhabar le hamārī chale ham chale

lakīreñ bhī miT miT ga.iiñ haath kī

zi-bas ham ne dast-e-ta.assuf male

rahe dil ke armān sab dil meñ haif

nikalne na paa.e mare hausle

baḌā ho buḌhāpe kā sab kho diyā

na merī javānī na vo valvale

gaḌā koī le kar dil-e-muztarib

mazāroñ meñ aane lage zalzale

siyah-kāriyoñ meñ kaTī 'umr sab

qalam kī tarah sar ke bal go chale

mohabbat butoñ kī ye dil chhoḌ de

kisī tarah chhātī se patthar Tale

shikāyat kā mauqa' na thā vasl meñ

ki thī raah thoḌī bahut the gile

koī dam meñ hai naqsh-e-hastī fanā

kidhar dhyān hai terā o bāvle

kinār-e-lahad meñ paḌe haiñ vo aaj

jo āġhosh-e-mādar meñ the kal pale

galā teġh-e-qātil se ragḌā kiyā

na jhichkā zarā vaah re manchale

na laayā koī sham-o-gul gor par

lahad meñ bhī dāġh-e-mohabbat jale

chale bāġh-e-hastī se ham nā-murād

kisī rut meñ ai gul na phūle-phale

azal se haiñ 'ushshāq mazbūh-e-husn

jo mānind-e-māhī kaTe haiñ gale

jo fariyādī tere bhī aa nikle vaañ

zamīñ hogī mahshar kī ūpar-tale

jo abrū ke hoñge ishāre yūñhī

mirī jaan lākhoñ kaTeñge gale

kiye jaa.e kāvish palak yaar kī

abhī dil ke phūTe nahīñ aable

sirā meñ na ġhāfil ho bāñdho kamar

chalo saath vaalo chalo ham chale

rahe merā jism-e-misālī sahī

balā se ye putlā saḌe yā gale

ye sab sar-zamīñ fitnā-añgez hai

hazāroñ hī uThte haiñ yaañ ġhalġhale

nazar bhar ke phir dekh luuñ shakl-e-yār

jo aa.ī huī merī dam bhar Tale

hamesha rahā daaġh daaġh apnā jism

sadā misl-e-sarv-e-charāġhāñ jale

falak ko milānā thā gar ḳhaak meñ

to phir nāz-o-ne.amat se kyuuñ ham pale

rahe bār-var shāḳh-e-naḳhl-e-murād

ilāhī hamesha to phūle-phale

zamāne pe afsurdagī chhā ga.ī

na haiñ ab vo charche na vo mashġhale

musāfir huuñ dilvā.ūñgā nazr-e-ḳhizr

jo tai hoñge raste ke sab marhale

lahū shab se aatā hai ashkoñ ke saath

kaleje ke nāsūr shāyad chhile

basar ho ga.ī is tamannā meñ 'umr

koī dost yak-rañg mujh ko mile

ye kyā rog ab ho gayā 'rind' ko

ka.ī saal udhar tak the change bhale

jalan dil ki likkhen jo hum dil-jale

zaban-e-qalam mein paDen aable

rah-e-sab-e-ulfat mein ghabra na dil

bahut aise pesh aaenge marhale

na din wo tumhaare na apna wo sin

tumhaare hamare wo din sin Dhale

'adam ki bhi kya rah hai be-nazir

chale jate hain pesh-o-pas qafile

wo ab nimcha kar chuke hain alam

ajal aa chuki sar pe kyun-kar Tale

Thahar ja koi dam ke mehman hain

KHabar le hamari chale hum chale

lakiren bhi miT miT gain hath ki

zi-bas hum ne dast-e-tassuf male

rahe dil ke arman sab dil mein haif

nikalne na pae mare hausle

baDa ho buDhape ka sab kho diya

na meri jawani na wo walwale

gaDa koi le kar dil-e-muztarib

mazaron mein aane lage zalzale

siyah-kariyon mein kaTi 'umr sab

qalam ki tarah sar ke bal go chale

mohabbat buton ki ye dil chhoD de

kisi tarah chhati se patthar Tale

shikayat ka mauqa' na tha wasl mein

ki thi rah thoDi bahut the gile

koi dam mein hai naqsh-e-hasti fana

kidhar dhyan hai tera o bawle

kinar-e-lahad mein paDe hain wo aaj

jo aaghosh-e-madar mein the kal pale

gala tegh-e-qatil se ragDa kiya

na jhichka zara wah re manchale

na laya koi sham-o-gul gor par

lahad mein bhi dagh-e-mohabbat jale

chale bagh-e-hasti se hum na-murad

kisi rut mein ai gul na phule-phale

azal se hain 'ushshaq mazbuh-e-husn

jo manind-e-mahi kaTe hain gale

jo fariyaadi tere bhi aa nikle wan

zamin hogi mahshar ki upar-tale

jo abru ke honge ishaare yunhi

meri jaan lakhon kaTenge gale

kiye jae kawish palak yar ki

abhi dil ke phuTe nahin aable

sira mein na ghafil ho bandho kamar

chalo sath walo chalo hum chale

rahe mera jism-e-misali sahi

bala se ye putla saDe ya gale

ye sab sar-zamin fitna-angez hai

hazaron hi uThte hain yan ghalghale

nazar bhar ke phir dekh lun shakl-e-yar

jo aai hui meri dam bhar Tale

hamesha raha dagh dagh apna jism

sada misl-e-sarw-e-charaghan jale

falak ko milana tha gar KHak mein

to phir naz-o-neamat se kyun hum pale

rahe bar-war shaKH-e-naKHl-e-murad

ilahi hamesha to phule-phale

zamane pe afsurdagi chha gai

na hain ab wo charche na wo mashghale

musafir hun dilwaunga nazr-e-KHizr

jo tai honge raste ke sab marhale

lahu shab se aata hai ashkon ke sath

kaleje ke nasur shayad chhile

basar ho gai is tamanna mein 'umr

koi dost yak-rang mujh ko mile

ye kya rog ab ho gaya 'rind' ko

kai sal udhar tak the change bhale