jalan ke KHauf se bahar nikal sako to chalo

jalan ke ḳhauf se bāhar nikal sako to chalo

bichhī hai dhuup hī rastoñ meñ chal sako to chalo

yahī taqāzā hai is baar bhī mohabbat kā

badan pe gard-e-safar ko jo mal sako to chalo

jalā ke zillat-e-shab meñ hatheliyoñ pe charāġh

havā ke ruḳh ko agarche badal sako to chalo

milā hai izn-e-masāfat kaḌe añdheroñ meñ

kisī charāġh kī lau meñ jo Dhal sako to chalo

ḳhayāl rakhnā ajal āḳhirī paḌāv nahīñ

azāb-e-umr se bāhar nikal sako to chalo

bahut hī TeḌhā hai ai dost ishq kā rasta

baġhair rāh-numā ke sambhal sako to chalo

is ek shart pe gulshan meñ dāḳhila hogā

kisī gulāb ke sāñche meñ Dhal sako to chalo

har ek gaam pe bikhrī hai raakh sadiyoñ kī

'nabīl' ban ke sharāra jo jal sako to chalo

jalan ke KHauf se bahar nikal sako to chalo

bichhi hai dhup hi raston mein chal sako to chalo

yahi taqaza hai is bar bhi mohabbat ka

badan pe gard-e-safar ko jo mal sako to chalo

jala ke zillat-e-shab mein hatheliyon pe charagh

hawa ke ruKH ko agarche badal sako to chalo

mila hai izn-e-masafat kaDe andheron mein

kisi charagh ki lau mein jo Dhal sako to chalo

KHayal rakhna ajal aaKHiri paDaw nahin

azab-e-umr se bahar nikal sako to chalo

bahut hi TeDha hai ai dost ishq ka rasta

baghair rah-numa ke sambhal sako to chalo

is ek shart pe gulshan mein daKHila hoga

kisi gulab ke sanche mein Dhal sako to chalo

har ek gam pe bikhri hai rakh sadiyon ki

'nabil' ban ke sharara jo jal sako to chalo