jald is shahr mein hai waqt wo aane wala

jald is shahr meñ hai vaqt vo aane vaalā

ham se Dar jā.egā ḳhud ham ko Darāne vaalā

kal vahī shahr meñ sho'loñ ko havā detā thā

ham samajhte the jise aag bujhāne vaalā

vaqt har daur meñ tārīḳh na.ī likhtā hai

miT na jaa.e kahīñ ḳhud ham ko miTāne vaalā

uTh khaḌe hoñge agar zulm ke maare hue log

phir na aa.egā koī tujh ko bachāne vaalā

tū kisī aur taraf kuuch kī tayyārī kar

hai koī aur tire taḳht par aane vaalā

koī hotā nahīñ zanjīr-e-sitam se āzād

vo satāyā huā ho yā ho satāne vaalā

bhuul jaatā hai ki haath us ke bhī jal jā.eñge

vo jo hai zulm ke sho'loñ ko baḌhāne vaalā

us se har ḳhuun ke qatre kā ḳhudā legā hisāb

hashr meñ jā.egā jab hashr uThāne vaalā

chup ye haq vaale na baiThe haiñ na baiTheñge kabhī

sun le hoñToñ pe mire muhr lagāne vaalā

ai parindo tumheñ hushiyār kiye dete haiñ

phir nayā jaal hai sayyād bichhāne vaalā

piT chuke sab tire mohre ab uThā apnī bisāt

khel hai ḳhatm tirā maat hai khāne vaalā

ham pe jo zaḳhm lage haiñ so lage haiñ lekin

ek din ḳhuun meñ tū bhī hai nahāne vaalā

maiñ karūñ tere liye jam' zar-o-lā’l-o-guhar

aur tū mere ḳhazānoñ ko luTāne vaalā

yuuñ tire shahr meñ fariyād sunī jaatī hai

pā-ba-zanjīr hai zanjīr hilāne vaalā

kyā 'ajab ret kī dīvār sā ḳhud bhī gir jaa.e

mere ghar ke dar-o-dīvār girāne vaalā

jald is shahr mein hai waqt wo aane wala

hum se Dar jaega KHud hum ko Darane wala

kal wahi shahr mein sho'lon ko hawa deta tha

hum samajhte the jise aag bujhane wala

waqt har daur mein tariKH nai likhta hai

miT na jae kahin KHud hum ko miTane wala

uTh khaDe honge agar zulm ke mare hue log

phir na aaega koi tujh ko bachane wala

tu kisi aur taraf kuch ki tayyari kar

hai koi aur tere taKHt par aane wala

koi hota nahin zanjir-e-sitam se aazad

wo sataya hua ho ya ho satane wala

bhul jata hai ki hath us ke bhi jal jaenge

wo jo hai zulm ke sho'lon ko baDhane wala

us se har KHun ke qatre ka KHuda lega hisab

hashr mein jaega jab hashr uThane wala

chup ye haq wale na baiThe hain na baiThenge kabhi

sun le honTon pe mere muhr lagane wala

ai parindo tumhein hushiyar kiye dete hain

phir naya jal hai sayyaad bichhane wala

piT chuke sab tere mohre ab uTha apni bisat

khel hai KHatm tera mat hai khane wala

hum pe jo zaKHm lage hain so lage hain lekin

ek din KHun mein tu bhi hai nahane wala

main karun tere liye jam' zar-o-la’l-o-guhar

aur tu mere KHazanon ko luTane wala

yun tere shahr mein fariyaad suni jati hai

pa-ba-zanjir hai zanjir hilane wala

kya 'ajab ret ki diwar sa KHud bhi gir jae

mere ghar ke dar-o-diwar girane wala